އިންޑިއާގެ ކްރިކެޓް ތަރިއެއް ކަމަށްވާ ޔުވްރާޖް ސިންގްގެ ބައޮގްރަފިކަލް ޑްރާމާއެއް ހަދަން ނިންމައިފި އެވެ.
ނަން އަދި ހާމަނުކުރާ މި ފިލްމު މިއަދު އިއުލާންކުރީ ބުޝަން ކުމާރުގެ ޓީ ސީރީޒާއި ޕްރޮޑިއުސަރު ރަވީ ބަގްޗަންދުކާ ގުޅިގެން ހަދާ ގޮތަށެވެ. ނަމަވެސް ފިލްމުގެ ޑައިރެކްޓަރާއި ފިލްމުގައި ޔުވްރާޖްގެ ރޯލު ކުޅޭނެ އެކްޓަރަކު ވެސް އަދި ހާމައެއްނުކުރެ އެވެ.
އެންމެ މަތީ ފަންތީގައި ކްރިކެޓް ކުޅުމަށް ފަހު މިހާރު އުމުރުން 42 އަހަރުގެ ޔުވްރާޖް ވަނީ 2019 ގައި އިންޓަނޭޝަނަލް ފެންވަރުގައި ކްރިކެޓް ކުޅުން ހުއްޓާލައިފަ އެވެ.
އޭނަގެ ވާހަކަ ކިޔައިދޭ ފިލްމެއް ހަދަން ނިންމި އިރު، ޔުވްރާޖަކީ އިންޑިއާގައި އުފެދުނު އެންމެ ހުނަރުވެރި އަދި އެންމެ ކާމިޔާބު ކްރިކެޓް ކުޅުންތެރިންގެ ތެރެއިން އެކެކެވެ. އާންމުންގެ ތެރޭގައި ވަރަށް ބޮޑު މަޝްހޫރުކަމެއް ލިބުނު ޔުވްރާޖަކީ ކްރިކެޓް އާއިލާއަކަށް ވެސް ނިސްބަތްވާ މީހެކެވެ. އޭނަގެ ބައްޕަ ޔޯގްރާޖް ސިންގް އަކީ ކުރީގެ މަޝްހޫރު ކްރިކެޓް ކުޅުންތެރިއެއްގެ އިތުރުން އެކްޓަރެއް ވެސް މެ އެވެ.
ސަލްމާން ޚާނާއި ކަރީނާ ކަޕޫރްގެ 2011 ގެ ފިލްމު "ބޮޑީގާޑް" ގެ ރޯލެއް ކުޅުނު ބަތަލާ ހޭޒެލް ކީޗްއާ ކައިވެނިކޮށް، މިހާރު ދެ ކުދިން ވެސް ތިބި ޔުވްރާޖަކީ ފުއްޕާމޭގެ ކެންސަރުގެ ޝިކާއަރަކަށްވެ، އެ ބަލިން ފަސޭހަ ވެސް ވެފައިވާ މީހެކެވެ.
ލާމަރުކަޒީ ނިޒާމު ހަރުދަނާ ކުރުމަށް
ޔުވްރާޖްގެ ބައޮޕިކެއް ހަދަން ނިންމި އިރު މީގެ ވެސް އިންޑިއާގެ ބައެއް އެތުލީޓުންގެ ވާހަކަ ފިލްމުތަކުގައި ކިޔައި ދީފައިވެ އެވެ. އެގޮތުން އެންމެ ފާހަގަކޮށްލެވޭ އެއް ފިލްމަކީ 2020 ގައި ދަންޖެހިގެން މަރުވި އެކްޓަރު ސުޝާންތު ރާޖްޕޫތާ އެކީ 2016 ގައި ގެނެސްދިން އެމްއެސް ދޯނީގެ ބައޮޕިކް "އެމްއެސް ދޯނީ: ދި އަންޓޯލްޑް ސްޓޯރީ" އެވެ.
އިންޑިއާގެ ކްރިކެޓް ތަރި ސޯރަވް ގަންގޫލީގެ ބައޮޕިކެއް ވެސް ހަދަން ވެސް އޮތީ އިއުލާންކޮށްފަ އެވެ. ރިޕޯޓްތައް ބުނާ ގޮތުން އެ ފިލްމު ކުޅޭނީ އަޔޫޝްމަން ކްރާނާ އެވެ.