އޮލިމްޕަހުގައި މިހާރު ދައްކަމުން އަންނަ ފިލްމު "ސާޔާ" އަންނަ މަހު އައްޑޫގައި އަޅުވާ ގޮތަށް ހަމަޖެހިއްޖެ އެވެ.
މަޝްހޫރު އެކްޓަރު ޔޫސުފް ޝަފީއު (ޔޫއްޕެ) ލިޔެ، ޑައިރެކްޓްކޮށް މުހިއްމު ރޯލެއް ވެސް ކުޅެފައިވާ ފިލްމު އައްޑޫގައި އަޅުވަން އަދި ހަމަޖެހިފައި ވަނީ ހުޅުމީދޫގައި އެކަންޏެވެ. އެއީ އަންނަ މަހުގެ 5 ވަނަ ދުވަހުގެ ރެ އެވެ. "ސާޔާ" އުފެއްދި ޝައި ޕްރޮޑަކްޝަނާއި ޔޫއްޕެ ޕްރޮޑަކްޝަނާ ގުޅިގެން ހުޅުމީދޫގެ ޝޯ އިންތިޒާމު ކުރަނީ މުލިމަތި ޔުނައިޓުންނެވެ.
އެގޮތުން މިހާރު އެ ޝޯގެ ޓިކެޓް ބުކްކުރެވޭނެ އެވެ.
މި މަހުގެ 7 ގައި ޕްރީމިއާކުރި "ސާޔާ" މިހާރު ރާއްޖޭގެ އެކި ހިސާބުތަކުގައި އަޅުވަމުން އަންނަ އިރު، އޮލިމްޕަހުގައި މި ފިލްމުގެ ފަހު ތިން ޝޯ ދައްކާނީ މި މަހުގެ 22، 23 އަދި 24 ގަ އެވެ.
"ސާޔާ" އަކީ ލޯބީގެ ބިރުވެރި ފިލްމެކެވެ. މީގެ ލީޑް ތަރިންނަކީ ޔޫއްޕެ އާއި އައިމިނަތު ރަޝްފާ (އާޝާ) ގެ އިތުރުން އިބްރާހީމް ޖިހާދު (ޖިމީ) އެވެ.
"ސާޔާ" ގައި ދައްކުވައި ދެނީ ފަޅުރަށަކަށް ހަނީމޫނަށްދާ ދެމަފިރިއެއްގެ ދެމެދަށް ތިން ވަނަ މީހަކު ވަދެ، އެ މީހުންގެ ތެރޭގައި ތެރޭގައި މައްސަލަގަނޑެއްގެ ތެރެއިން ފެންމަތިވާ ބިރުވެރި ހާދިސާތަކެކެވެ.