ކުރިމަތިވާ ކާރިސާތަކާ ގުޅިގެން އެހީތެރިކަން ފޯރުކޮށް ދިނުމަށް ރާއްޖޭގެ ބައެއް ސަރަހައްދުގައި ރީޖަނަލް އިމަޖެންސީ ސެންޓަރުތަކެއް ހެދުމަށް މަސައްކަތް ފަށާފައިވާ ކަމަށް ނޭޝަނަލް ޑިޒާސްޓާ މެނޭޖްމެންޓް އޮތޯރިޓީ (އެންޑީއެމްއޭ) އިން ބުނެފި އެވެ.
އެތަނުގެ ސީއީއޯ ހިސާން ހަސަން އެސްއެސް ޓީވީގައި ވިދާޅުވީ ކާރިސާތަކުގެ ހާލަތުގައި، އަތޮޅު ތެރޭގައި ދިރިއުޅޭ ފަރާތްތަކަށް ފަސޭހަ އިން އަވަހަށް އެހީތެރިކަން ފޯރުކޮށް ދެވޭނެ އިންތިޒާމުތައް ހަމަޖެހިފައި ހުރުމަކީ ވަރަށް މުހިންމު ކަމެއް ކަމަށެވެ. އެހެންވެ އަތޮޅުތެރޭގެ ދުރު ހިސާބުތަކަށް އެހީތެރިކަން ފޯރުކޮށް ދިނުމުގައި މިހާރު ހުރި ދަތިތަކާއި ހުރަސްތައް ކުޑަކުރުމަށްޓަކައި ބައެއް ސަރަހައްދުތަކުގައި ރީޖަނަލް އިމަޖެންސީ ސެންޓަރުތަކެއް ގާއިމު ކުރެވޭނެ ކަމަށް ވިދާޅުވި އެވެ.
ހިސާން ވިދާޅުވީ އެންޑީއެމްއޭއާ އެކު ފަސްޓް ރެސްޕޮންޑާސްގެ ގޮތުގައި ހަރަކާތްތެރިވާ ފުލުހުންނާއި، މޯލްޑިވްސް ރެޑް ކްރެސެންޓާ ވެސް އެކު، އެ ތަންތަން ހިންގުމަށް ވިސްނާފައިވާ ކަމަށެވެ.
"ކުރިޔަށް އޮތްތާނގައި، ކާރިސާއެއްގެ ވަގުތުގައި ބޭނުންވާ ޒަރޫރީ ތަކެތި، ނޫނީ ރެސްޕޮންސަށް ބޭނުންވާ އިކުއިޕްމެންޓްސް، ޕަމްޕު، ހޮޅި އަދި މި ނޫން ވެސް ތަކެތި ލިބޭނެ ގޮތަށް ހަމަޖެހިފައި ހުރުމަކީ އަޅުގަނޑުމެން ދެކެން ބޭނުންވާ ދުވަހެއް." އޭނަ ވިދާޅުވި އެވެ.