ކަތުރުތަކެއް ގެއްލުމާ ގުޅިގެން ޖަޕާންގެ އެއާޕޯޓެއްގެ އޮޕަރޭޝަނަށް ބުރޫ އަރައި، އެތައް ހާސް ދަތުރުވެރިންނަށް އެކަމުގެ ތަކުލީފާ ކުރިމަތިލާން ޖެހިއްޖެ އެވެ.
މީޑިއާތަކުން ބުނީ މިކަމެއް ދިމާވީ މިދިޔަ ހޮނިހިރު ދުވަހު ހޮކައިޑޫގެ ނިއު ޗިޓޯސް އެއާޕޯޓްގެ ޑޮމެސްޓިކް ޓާމިނަލްގައި ކަމަށެވެ. އެގޮތުން ތަނުބެ ބޯޑިން ގޭޓާ ދިމާލު ކައުންޓަރަކުން ކަތުރުތަކެއް ވީނުވީއެއް ނޭނގި ގެއްލިގެން ސަލާމަތީ ސަބަބުތަކަށްޓަކައި އެ ހޯދަން ޖެހުމާ ގުޅިގެން 36 ފްލައިޓެއް ކެންސަލްކޮށް، 201 ދަތުރެއް ލަސްވެގެން ދިޔަ އެވެ.
ކަތުރުތަކެއް ގެއްލުމާ ގުޅިގެން ފުރަން ގޮސް ތިބި ގިނަ އަދަދެއްގެ ބަޔަކު އެއާޕޯޓްގައި ތޮއްޖެހި، އަލުން ޗެކްކުރަން ޖެހުމެނެވެ. އެގޮތުން އެއާޕޯޓްގެ ޑޮމެސްޓިކް އޮޕަރޭޝަން ދެ ގަޑިއެއްހާ އިރަށް މެދުކަނޑާލައި، އެއާޕޯޓްގެ ސެކިއުރިޓީ އޮފިޝަލުން ކަތުރުތައް ހޯދަމުގެ މަސައްކަތް ކުރިއަށް ގެންދިޔަ އެވެ.
އަދި ކަތުރުތައް ފެނުނީ އެ ތަކެތި ގެއްލުނު ކައުންޓަރު ކައިރިން އާދީއްތަ ދުވަހު އެތަނުގެ މުވައްޒަފުންތަކަކަށް ކަމަށް ނިއު ޗިޓްސޯ އެއާޕޯޓް ހިންގަމުން އަންނަ ކުންފުނި، ހޮކައިޑޯ އެއާޕޯޓް އިން އިއްޔެ ބުންޏެވެ. އަދި ފެނުނީ ގެއްލުނު ކަތުރުތައްކަން ކަށަވަރުކޮށްފައިވެ އެވެ.
މި ހާދިސާއާ ގުޅިގެން ޖަޕާނުގެ ލޭންޑް، އިންފްރާސްޓްރަކްޗާ، ޓްރާންސްޕޯޓް އެންޑް ޓޫރިޒަމް އިން ވަނީ އެފަދަ ކަމެއް ދެން ތަކުރާރު ނުވާނެ ގޮތަކަށް އެއާޕޯޓްގެ ކަންކަން އިންތިޒާމުކޮށް، ދަތުރުވެރިންގެ ހިތްތަކުގައި ބިރުވެރިކަން އުފެދިދާނެ ފަދަ ކަންކަމުން ދުރާލައި ރައްކާތެރިކަމުގެ ފިޔަވަޅުތައް އަޅަން ހޮކައިޑޯ އެއާޕޯޓްގެ މެނޭޖްމަންޓަށް އަންގައިފަ އެވެ.