ކަރީނާ ކަޕޫރް ޑިޓެކްޓިވެއްގެ ރޯލު ކުޅެފައިވާ ކްރައިމް ތުރިލާ "ދަ ބަކިމްހަމް މާޑާސް" ގެ ޓީޒާ ޓްރެއިލާ މިއަދު ދައްކާލައިފި އެވެ.
އިނގިރޭސިވިލާތުގެ ބަކިމްހަމްޝަޔާގައި މަރައިލާ 10 އަހަރުގެ ކުއްޖެއްގެ މަރުގެ ހަގީގަތް ހޯދަން ޑިޓެކްޓިވަކު ކުރާ މަސައްކަތާއި އޭގެ ސަބަބުން އޭނަ އަށް ކުރިމަތިވާ ނުކުރައްކާތަކާ ކުރިމަތިލާ ގޮތް ދައްކުވައިދޭ މި ފިލްމަކީ ކުޅަދާނަ ޑައިރެކްޓަރު ހެންސަލް މެހެތާ ހަދާފައިވާ ފިލްމެކެވެ.
މިއީ މިދިޔަ އަހަރު ނެޓްފްލިކްސް އިން ގެނެސްދިިން "ޖާނެ ޖާ" އަށް ފަހު، އަނެއްކާ ވެސް ކަރީނާގެ ވަރަށް ސީރިއަސް ރޯލެއް ފެންނާނެ ފިލްމެކެވެ.
މި އަހަރުގެ އެންމެ އުންމީދީ ފިލްމުތަކުގެ ތެރޭގައި ހިމެނޭ "ދަ ބަކިމްހަމް މާޑާސް" އަކީ މި އަހަރުގެ މާޗްގައި ރިލީޒްކުރި ކަރީނާގެ ކާމިޔާބު ހެއިސްޓް ކޮމެޑީ، "ކްރޫ" ގެނެސްދިން އެކްތާ ކަޕޫރް ޕްރޮޑިއުސްކޮށްފައިވާ ފިލްމެކެވެ.
ފިލްމު ސިނަމާތަކަށް ދޫކޮށްލަން ހަމަޖެހިފައި ވަނީ ސެޕްޓެމްބަރު 13 ގަ އެވެ.