ވަޒީފާއާ ބެހޭ ގާނޫނު އިސްލާހު ކުރިޔަސް ބިދޭސީންގެ ކޯޓާ އާއި އެހެނިހެން ފީތައް ބޮޑުނުކުރާނެ ކަމަށާއި އެފަދަ ވިސްނުމެއް ވެސް ނެތް ކަމަށް ހޯމްލޭންޑް މިނިސްޓަރު އަލީ އިހުސާން ވިދާޅުވެއްޖެ އެވެ.
ބިފޭސީ މަސައްކަތްތެރިންނާ ގެންގުޅޭ ފަރާތްތަކާއި "އެކްސްޕެޓް ސިސްޓަމް" ބޭނުންކުރައްވާ ފަރާތްތަކާ ބައްދަލުކުރުމަށްޓަކާއި މިއަދު އިސްކަންދަރު ކޮށީގައި ބޭއްވި ބައްދަލުވުމެއްގައި މިނިސްޓަރު ފީތަކަށް އެއްވެސް ބަދަލެއް ގެންނަން ނޫޅޭ ކަމަށެވެ.
"ކޯޓާ ފީ އިތުރުކުރުމުގެ އެއްވެސް ވިސްނުމެއް ނެތް. ވިސާ ފީ އިތުރުކުރުމުގެ ވެސް ވިސްނުމެއް ނެތް،" އިހުސާން ވިދާޅުވި އެވެ. "އިންޝުއަރެންސް ފީ ބޮޑެއް ނުވާނެ. ބޮޑުކުރަން ސަރުކާރުގެ ވިސްނުމެއް ނެތް."
މިއަދުގެ ބައްދަލުވުމުގައި ކޯޓާ ފީއާ ގުޅޭ ގޮތުން ހޯމް މިނިސްޓަރު ފާހަގަކުރެއްވި އަނެއް ކަމަކީ ކޯޓާ ފީ ބަލްކުކޮށް ދެއްކޭނެ ގޮތް ފަހިކޮށް ދިނުމެވެ. މިހާތަނަށް މިކަން އޮންނަނީ ވަކިވަކިން ކަމަށް ވިޔަސް މިއަދުން ފެށިގެން އެއްފަހަރާ ފައިސާ ދެއްކޭނެ އިންތިޒާމު ހަމަޖެހިފައިވާ ކަމަށް ވިދާޅުވި އެވެ.
ބިދޭސީން ގެންގުޅޭ ވިޔަފާރިވެރިންނާއި އާންމުނާ ހޯމްލޭންޑް މިނިސްޓްރީން މިއަދު ބައްދަލުކުރީ ބިދޭސީ މަސައްކަތްތެރިންނާ ގުޅޭ ގޮތުން ސަރުކާރުގެ ސިޔާސަތު ސާފުކޮށް ދިނުމަށާއި އެ މައްސަލައިގައި ހުރި ކަންބޮޑުވުންތައް އަޑުއެހުމަށެވެ.
އެ ބައްދަލުވުމުގައި ވިޔަފާރިވެރިންނާއި "އެކްސްޕެޓް ސިސްޓަމް" ބޭނުންކުރާ ގިނަ ބަޔަކު ބައިވެރިވި އެވެ.