އެންމެ ދުވަސްވީ އަންހެނާގެ ގޮތުގައި ދުނިޔޭގެ ރެކޯޑް ފޮތަށް އެންމެ ފަހުން އެރި މީހާ މަރުވެއްޖެ އެވެ.
ގިނިސް ވޯލްޑް ރެކޯޑުން މިއަދު ބުނީ މިދިޔަ އަހަރުގެ ޖެނުއަރީގައި އެ ރެކޯޑް ލިބުނު ސްޕެއިނަށް ނިސްބަތްވާ މަރާޔާ ބްރަޔަންސް މޮރޭރާ އިއްޔެ މަރުވި އިރު، އުމުރަކީ 117 އަހަރާއި 168 ދުވަސް ކަމަށެވެ. އޭނަ މަރުވީ އުޅެމުން އައި ސްޕެއިންގެ ކެޓަލޯނިއާގެ ދުވަސްވީ މީހުން ބަލަހައްޓާ މަރުކަޒެއްގަ އެވެ.
މަރާޔާ އަށް އެންމެ ދުވަސްވީ އަންހެނާގެ ރެކޯޑް މިދިޔަ އަހަރު ލިބުނީ ކުރިން އެ ރެކޯޑް އޮތް ފްރާންސްގެ ލުސިލް ރޭންޑަން އުމުރުން 118 އަހަރުގައި މަރުވުމާ ގުޅިގެންނެވެ.
ސްޕެއިނުން އެމެރިކާ އަށް ހިޖުރި އާއިލާއަކަށް މަރާޔާ އުފަންވީ އެމެރިކާގެ ކެލިފޯނިއާ ސެން ފްރަންސިސްކޯ އަށް މާޗް 4، 1907 ގަ އެވެ. އެއީ އޭނަގެ މައިންބަފައިން އެމެރިކާ އަށް ހިޖުރަކުރިތާ އެއް އަހަރު ފަހުންނެވެ. އެކަމަކު 8 އަހަރު ފަހުން އަނެއްކާ ވެސް އެ އާއިލާ ސްޕެއިނަށް ބަދަލުވެ، މަރާޔާ ދިރިއުޅެމުން އައީ ކެޓަލޯނިއާގަ އެވެ.
އިއްޔެ މަރާޔާ މަރުވި އިރު، އޭނަ ނާސިން ހޯމެއްގައި އުޅޭތާ 22 އަހަރަށް ވުރެ ގިނަ ދުވަސްވެފައިވެ އެވެ.
މިހާރު ދުނިޔޭގައި ހުރި އެންމެ ދުވަސްވީ ފިރިހެނަކީ މި އަހަރުގެ އެޕްރީލް މަހުގެ ތެރޭގައި ދުނިޔޭގެ ރެކޯޑް ފޮތަށް އެރި އިނގިރޭސިވިލާތުގެ ޖޯން އަލްފްރެޑް ޓިނިސްވުޑް އެވެ. އޭނަ އަށް މިހާރު 111 އަހަރެވެ. އަލްފްރެންޑް އުފަންވީ މަޝްހޫރު "ޓައިޓޭނިކް" ފެތުރު އަހަރު ކަމަށްވާ 1912 ވަނަ އަހަރުގެ އޮގަސްޓް 26 ގަ އެވެ.