ފޮރިން މިނިސްޓަރު މޫސާ ޒަމީރު، ސައުދީގެ ސެންޓްރަލް ބޭންކުގެ ގަވަރުނަރު އައިމަން އަލް ސަޔާރީއާ މިއަދު ބައްދަލުކުރައްވައިފި އެވެ.
ފޮރިން މިނިސްޓްރީން ބުނީ މި ބައްދަލުވުމުގައި ރާއްޖޭގެ މާލީ ހާލަތުގެ އެންމެފަހުގެ މައުލޫމާތު މިނިސްޓަރު ޒަމީރު ސައުދީގެ ސެންޓްރަލް ބޭންކުގެ ގަވަރުނަރަށް އަރުވާފައިވާ ކަމަށެވެ.
އަދި ރާއްޖޭގެ ޓޫރިޒަމްގެ ސިނާއަތް ކުރިއަރަމުން އަންނަ ގޮތާއި ގުޅޭގޮތުންނާއި، ރާއްޖޭގައި ހުރި އިންވެސްޓްމެންޓުގެ ފުރުސަތުތަކާއި ގުޅޭ މައުލޫމާތު ވެސް ގަވަރުނަރަށް އަރުވާފައިވާ ކަމަށް މިނިސްޓްރީން ބުނެ އެވެ.
މިނިސްޓަރު ޒަމީރު ސައުދީ އަށް ވަޑައިގެންނެވީ ސައުދީގެ ފޮރިން މިނިސްޓަރު ފައިސަލް ބިން ފަރުހާން އަލް ސައުދުގެ ދައުވަތަކަށެވެ. މި ދަތުރުފުޅުގައި ޒަމީރު ވަނީ ރައީސުލްޖުމްހޫރިއްޔާ ޑރ. މުހައްމަދު މުއިއްޒު، ސަޢޫދީ ޢަރަބިއްޔާގެ ވަލީއަހުދު އަދި ބޮޑުވަޒީރު މުޙައްމަދު ބިން ސަލްމާން ބިން ޢަބްދުލްޢަޒީޒް އަލް ސަޢުދަށް ފޮނުއްވެވި ސިޓީފުޅެއް ސައުދީގެ ފޮރިން މިނިސްޓަރަށް އިއްޔެ ރައްދު ކުރައްވާފަ އެވެ.
ޒަމީރު ސައުދީއަށް ކުރައްވާ ފަސް ދުވަހުގެ މި ދަތުރުފުޅުގައި ސަޢޫދީ ސަރުކާރުގެ އިސް ވެރިންނާއި ބައްދަލުކުރައްވަމުން ގެންދަވާއިރު، ރިޔާދުގައި ދިރިއުޅޭ ދިވެހިންނާ ބައްދަލުކުރެއްވުމަށް ވެސް ވަނީ ހަމަޖެހިފަ އެވެ.
މި ދަތުރުފުޅުގައި މި ފަހުން އެމްއެމްއޭގެ ގަވަރުނަރު ކަމަށް އައްޔަންކުރި އަހުމަދު މުނައްވަރު ވެސް ބައިވެރިވެވަޑައިގަންނަވަ އެވެ.