ވިހާވެސް ގިނަ ދިވެހިންނަށް ފުރުސަތުތައް ހޯދައިދިނުމަކީ އަމާޒެއް ކަމަށް ފޮރިން މިނިސްޓަރު މޫސާ ޒަމީރު ވިދާޅުވެއްޖެ އެވެ.
ޒަމީރު މިހެން ވިދާޅުވީ ސައުދީ އަރަބިއްޔާ އަށް މިހާރު ކުރައްވަމުން ގެންދަވާ ދަތުރުފުޅުގެ ތެރެއިން، އެގައުމުގެ ވެރިރަށް ރިޔާދުގައި ދިރިއުޅޭ ދިވެހިންނާއެކު ބޭއްވި ބައްދަލުވުމުގަ އެވެ. އެ ބައްދަލުވުމުގައި އެގައުމުގައި ތައުލީމު ހާސިލުކުރަމުންދާ ދަރިވަރުންނާއި އެކި މަސައްކަތްތަކުގައި ހަރަކާތްތެރިވާ ބޭފުޅުންނާއި، އެ ފަރާތްތަކުގެ އާއިލާގެ މެމްބަރުން ބައިވެރިވި އެވެ.
މި ބައްދަލުވުމާ ގުޅޭގޮތުން "އެކްސް"ގައި ކުރެއްވި ޕޯސްޓެއްގައި ޒަމީރު ވިދާޅުވީ ރިޔާދުގައި ދިރިއުޅޭ ދިވެހިންނާ ބައްދަލުކޮށް ހިޔާލު ބަދަލުކުރުމުގެ ފުރުސަތު ލިބުމަކީ ލިބުނު އުފަލެއް ކަމަށެވެ. ވީހާވެސް ގިނަ ދިވެހިންނަށް ތަފާތު އެކި ދާއިރާތަކުން ފުރުސަތުތައް ހޯދައިދިނުމަކީ ސަރުކާރުގެ އަމާޒެއް ކަމަށްވެސް ޒަމީރު ވިދާޅުވި އެވެ.
ޒަމީރު ސައުދީ އަށް ވަޑައިގެންނެވީ ސައުދީގެ ފޮރިން މިނިސްޓަރު ފައިސަލް ބިން ފަރުހާން އަލް ސައުދުގެ ދައުވަތަކަށެވެ. މި ދަތުރުފުޅުގައި ޒަމީރު ވަނީ ރައީސުލްޖުމްހޫރިއްޔާ ޑރ. މުހައްމަދު މުއިއްޒު، ސަޢޫދީ ޢަރަބިއްޔާގެ ވަލީއަހުދު އަދި ބޮޑުވަޒީރު މުޙައްމަދު ބިން ސަލްމާން ބިން ޢަބްދުލްޢަޒީޒް އަލް ސަޢުދަށް ފޮނުއްވެވި ސިޓީފުޅެއް ސައުދީގެ ފޮރިން މިނިސްޓަރަށް ރައްދު ކުރައްވާފަ އެވެ.
ޒަމީރު ސައުދީއަށް ކުރައްވާ ފަސް ދުވަހުގެ މި ދަތުރުފުޅުގައި ސަޢޫދީ ސަރުކާރުގެ އިސް ވެރިންނާއި ގެންދަވަނީ ބައްދަލުކުރައްވަމުންނެވެ. މި ދަތުރުފުޅުގައި މި ފަހުން އެމްއެމްއޭގެ ގަވަރުނަރު ކަމަށް އައްޔަންކުރި އަހުމަދު މުނައްވަރު ވެސް ބައިވެރިވެވަޑައިގަންނަވަ އެވެ.