ފަސް ރަށެއްގައި އަލަށް އައިސްޕްލާންޓްތަކެއް ބަހައްޓަން ހަމަޖެހިފައިވާތީ އެ މަސައްކަތްކޮށް ދޭނެ ބަޔަކު ހޯދަން ފިނޭންސް މިނިސްޓްރީން ބީލަމަށް ހުޅުވާލައިފި އެވެ.
އެ މިނިސްޓްރީން ބުނީ އައިސްޕްލާންޓްތައް ބަހައްޓަން ހަމަޖެހިފައި ވަނީ ހއ. ދިއްދު އާއި އއ. ރަސްދު އާއި ގދ. ރަތަފަންދު އާއި ހއ. އިހަވަންދޫގެ އިތުރުން ށ. ކޮމަންޑޫގައި ކަމަށެވެ. ސައުދީ ފަންޑް ފޯ ޑިވެލޮޕްމަންޓްގެ އެހީގައި މިއިން ކޮންމެ ރަށެއްގައި ބަހައްޓަން ހަމަޖެހިފައި ވަނީ 50 ޓަނުގެ އައިސްފްލާންޓްތަކެވެ.
އެހެންވެ މި މަސައްކަތްކޮށްދޭން ޝައުގުވެރިވާ ފަރާތްތަކަށް އޮކްޓޯބަރު 20 އާ ހަމައަށް ބީލަން ހުށަހެޅުމުގެ ފުރުސަތު ވަނީ ހުޅުވާލައިފަ އެވެ. މި ބީލަމުގެ ބިޑް ސެކިއުރިޓީގެ ގޮތުގައި 250،000ރ. ހުށަހަޅަން ޖެހެ އެވެ. އަދި ބިޑް ސެކިއުރިޓީގެ މުއްދަތަކީ ބިޑު ހުޅުވާ ތާރީހުން ފެށިގެން 148 ދުވަހެވެ.
ފިނޭންސް މިނިސްޓްރީން ބުނީ ބީލަމާ ގުޅޭ މައުލޫމާތު ސެޝަނެއް އޮންލައިންކޮށް ޓީމްސް މެދުވެރިކޮށް ސެޝަނެއް އަންނަ މަހުގެ 10 ވަނަ ދުވަހުގެ މެންދުރު ފަހު 1:00 ގައި އޮންނާނެ އެވެ. އަދި ބީލަމުގައި ބައިވެރިވާން އޮކްޓޯބަރު 15 އާ ހަމައަށް ވަނީ ރަޖިސްޓްރީވުމުގެ ފުރުސަތު ހުޅުވާލައިފަ އެވެ. އެކަމަށް 1،500ރ. ގެ ފީއެއް ދައްކަން ޖެހެ އެވެ.
ފިނޭންސް މިނިސްޓްރީން އައިސްޕްލާންޓްތައް ގާއިމުކޮށް ދޭނެ ބަޔަކު ހޮވާނީ އިންޓަނޭޝަނަލް ބިޑިން (އެންސީބީ) އުސޫލުގެ ދަށުން ސައުދީ ފަންޑް ފޯ ޑިވެލޮޕްމަންޓްގެ "ގައިޑްލައިން ފޯ ޕްރޮކިއުމަންޓް އޮފް ގުޑްސް އެންޑް ކޮންޓްރެކްޓިންގ ފޯ ދަ އެކްޒެކިއުޝަން އޮފް ވޯކްސް" އާ އެއްގޮތަށް ކަމަށެވެ.