މި އަހަރުގެ މިހާތަނަށް ރާއްޖެ އަށް އައި ޓޫރިސްޓުންގެ އަދަދު 1.3 މިލިއަނަށް އަރައިފި އެވެ.
ޓޫރިސްޓް އެރައިވަލްސްގެ އެންމެ ފަހުގެ ތަފާސްހިސާބުތައް ދައްކާ ގޮތުން މި މަހުގެ 19 ގެ ނިޔަލަށް ރާއްޖެއަށް ޖުމްލަ 1.3 މިލިއަން ޓޫރިސްޓުން އައިސްފައިވެ އެވެ. މިއީ މިދިޔަ އަހަރުގެ މި މުއްދަތާ އަޅާބަލާ އިރު 10.4 ޕަސެންޓްގެ އިތުރުވުމެކެވެ.
ރާއްޖެ އަށް މިހާރު އެންމެ ގިނައިން ޓޫރިސްޓުން އަންނަ ތިން ގައުމަކީ ޗައިނާ އާއި ރަޝިއާ އަދި އިނގިރޭސިވިލާތެވެ. އެ ތިން ގައުމުން އައި ޓޫރިސްޓުންގެ އަދަދު ލައްކަ އިިން މައްޗަށް އަރަ އެވެ. ރާއްޖެ އަށް އެންމެ ގިނަ ޓޫރިސްޓުން އަންނަ 10 ގައުމަށް ބަލާ އިރު މީގެ ތެރޭގައި އިޓަލީ، ޖަރުމަން، އިންޑިއާ، އެމެރިކާ، ފްރާންސް، ސްވިޓްޒަލޭންޑް އަދި ސްޕެއިން ހިމެނެ އެވެ.
ރާއްޖޭގައި މިހާރު 174 ރިސޯޓާއި 879 ގެސްޓްހައުސް އާއި 153 ސަފާރީ އުޅަނދު އަދި 14 ހޮޓާ ހިންގަ އެވެ.
ރާއްޖޭގެ މި އަހަރުގެ ޓާގެޓަކީ މަދުވެގެން 2 މިލިއަން ޓޫރިސްޓުން ގެނައުމެވެ.
މިހާރު އެވްރެޖްކޮށް ރާއްޖެ އަށް ދުވާލެއްގެ މައްޗަށް 5،600 އަށް ވުރެ ގިނަ ޓޫރިސްޓުން ޒިޔާރަތްކުރެ އެވެ.