ރާއްޖޭގެ އުތުރަށް ރޭ ކުރި ވިއްސާރައިގައި ހަތަރު ރަށަކަށް ގެއްލުންވެގެން ރިޕޯޓްކޮށްފައިވާ ކަމަށް ނެޝަނަލް ޑިޒާސްޓާ މެނޭޖްމަންޓް އޮތޯރިޓީ (އެންޑީއެމްއޭ) އިން ބުނެފި އެވެ.
އެތަނުން މިއަދު ބުނި އެންމެ ބޮޑަށް ގެއްލުންވީ ކުޅުއްފުއްޓަށް ކަމަށެވެ. އެގޮތުން އެ ސިޓީގެ 57 ގެއަކަށް ފެން ވަދެ ގެއްލުންވެފައިވާ އިރު، ތިން ގެއެއްގެ މީހުން ބަދަލު ކުރަން ޖެހުނެވެ.
ވިއްސާރާގައި އުތުރުން ރޭ ގެއްލުންވި ރަށްތަކަށް ބަލާ އިރު، ހއ. ހޯރަފުށީގެ ދެ ގެއަކަށް ށ. ފީވަކުގެ ފަސް ގެއަކަށް އަދި އެ އަތޮޅު ނޫމަރާގެ ފަސް ގެއަކަށް ފެން ވަދެ ގެއްލުންވެފައިވެ އެވެ. މި ރަށްތަކަށް ގެއްލުންވި އިރު ހއ. އަތޮޅުން ފެށިގެން ށ. އަތޮޅާ ހަމައަށް ރޭ 8:30 އިން 10:30 އަށް އޮތީ އޮރެންޖް އެލާޓް ވެސް ނެރެފަ އެވެ.
އުތުރުގެ އަތޮޅުތަކަށް ރޭ ކުރި ވިއްސާރާގައި ހއ. ހޯރަފުށީގެ 2 ގެއަކަށް, ހދ ކުޅުދުއްފުށީގެ 57 ގެއަކަށް, ށ.ފީވަކުގެ 5 ގެއަކަށް އަދި ށ.ނޫމަރާގެ 5 ގެއަކަށް ފެން ވަދެ ވަނީ ގެއްލުން ވެފަ. އަދި ކުޅުދުއްފުށީގެ 3 ގެއަކުން މީހުން ބަދަލުކުކުރެވިފައިވޭ pic.twitter.com/1ralyWoELt
— NDMA Maldives (@NDMAmv) August 21, 2024
މިދިޔަ ހަފުތާ އާއި މި ހަފުތާގައި ވެސް މުޅި ރާއްޖެ އަށް މޫސުން ގޯސްވެ، ބޯކޮށް ވާރޭ ވެހި، ވައި ގަދަވެ، އެކި ރަށްރަށަށް އެކު ވަރުގެ ގެއްލުންތައް ވެފައިވެ އެވެ.
މޫސުމާ ބެހޭ އިދާރާ އިން ބުނީ މޫސުން މިހާރު ހުރިހާ ހިސާބަކަށް ވެސް އަލިވަމުން އަންނަ ކަމަށެވެ. އެކަމަކު އަދިވެސް ބައެއް ހިސާބުތަކަށް ކެރީގެ އަސަރު ފޯރާނެ ކަމަށް ލަފާކޮށްފައިވެ އެވެ.