މީގެ ދެ އަހަރު ކުރިން ކައިވެނި ކުރި ހޮލީވުޑްގެ މަޝްހޫރު ތަރިން ކަމަށްވާ ބެން އެފްލެކާއި ޖެނިފާ ލޮޕޭޒް (ޖޭލޯ) ގެ ކައިވެނި ރޫލައިލަން ކޯޓަށް ހުށަހަޅައުިފި އެވެ.
މީޑިއާތަކުން ބުނީ ޖޭލޯގެ ފަރާތުން ލޮސް އެންޖެލިސްގެ ކައުންޓީ ސުޕީރިއާ ކޯޓަށް މައްސަލަ ހުށަހެޅީ އިއްޔެ ކަމަށެވެ. ކޯޓަށް ހުށަހެޅި މައްސަލައިގައިވާ ގޮތުން އެފްލެކްގެ ގާތުން ވަރިވާން ޖޭލޯ ނިންމީ މި އަހަރުގެ އެޕްރީލް މަހުގެ 26 ގަ އެވެ.
ދެހާސް ބާވީހުގެ ޖުލައި މަހުގެ ތެރޭގައި ދެ ތަރިން ކައިވެނިކުރީ ލޯބީގެ "ފޮނި/ހިތި ކުޅިގަނޑެއް" ގެ ދިގު މާޒީއަކަށް ފަހު އެވެ. ނަމަވެސް ކައިވެނި ކުރިތާ މާ ގިނަ ދުވަހެއް ނުވަނީސް ދެ މީހުންގެ މެދުގައި ކުނި ޖެހ، ވަރިވާން އުޅޭކަމުގެ ވާހަކަތައް މީޑިއާތަކުގައި ދެކެވެން ފެށި އެވެ.
އެގޮތުން މި އަހަރުގެ ކުރީކޮޅުން ފެށިގެން ދެ މީހުން އެކަކު އަނެކަކާ ވާހަކަ ވެސް ނުދައްކާ ކަމަށާއި އުޅެމުން ވެސް އަންނަނީ ވަކިން ކަމަށް ބުނެ މީޑިއާތަކުގައި އެ ވާހަކަ ވަރަށް ބޮޑަށް ދެކެވެމުން އައިސްފައިވެ އެވެ.
ޖޭލޯ، 54، އާއި އެފްލެކް، 51، ގެ ކައިވެނި ރޫޅައިލަން ކޯޓަށް ހުށަހެޅި އިރު، ދެ ކުދިން ތިބި ޖޭލޯ ކުރިން ވެސް ތިން ކައިވެންޏެއްކުރި އެވެ. އަދި އެފްލެކަކީ ކުރިން ބަތަލާ ޖެނިފާ ގާނާއާ ކައިވެނިކޮށް ތިން ދަރިން ވެސް ލިބިފައިވާ މީހެކެވެ. އެ ދެ މީހުން ވަކިވީ 2018 ގަ އެވެ.