ރާއްޖޭގައި ހެލިކޮޕްޓަރުގެ ހިދުމަތް ދޭން ރީޖަނަލް އެއާޕޯޓްސް ކޮންޕެނީ ލިމިޓެޑް (އާރްސީއެލް) އިން ދުބާއީގެ އެއާ ޝާޓޯ ޑީޑަބްލިއުސީ އާއި ވިންގް ކެޕިޓަލް މެނޭޖްމަންޓާ އެކު އެއްބަސްވުމެއްގައި ސޮއިކޮށްފި އެވެ.
މިކަން ހާމަކޮށް ބޭރުގެ ނޫހެއް ކަމަށްވާ އާބަން އެއާ މޮބިލިޓީން ބުނީ "ޕްރޮޖެކްޓް އެލެވޭޓް މޯލްޑިވްސް" ގެ ނަން ދީފައިވާ މި އެއްބަސްވުމުގެ ދަށުން ހެލިކޮޕްޓަރާއި ޑްރޯން ޖެއްސޭ ގޮތަށް 100 ހައިބްރިޑް ވާޓި-ޕޯޓްސް ގާއިމުކޮށް، ހެލިކޮޕްޓަރުގެ ހިދުމަތަށް ހުޅުވައިލާނެ ކަމަށެވެ. އަދި އެއްބަސްވުން ހެދީ 20 އަހަރަށް ކަމަށް ވެސް އެ ނޫހުން ބުންޏެވެ.
މޮބިލިޓީން ރިޕޯޓްކޮށްފައިވާ ގޮތުގައި ހެލިކޮޕްޓަރުގެ ހިދުމަތަށް ހަދާ ޕޯޓުތަކުގައި ޓަޗް ޑައުން އެންޑް ލިފްޓް އޮފް އޭރިއާތަކާއި، ސަލާމަތީ ޒޯންތަކާއި، ޓާމިނަލް ވެއިޓިން ހޯލްތައް ހިމެނޭނެ އެވެ. އަދި، ކާގޯ އޮޕަރޭޝަން ހިމެނޭހެން ތަފާތު ކަންކަމަށް 500 ޑްރޯން ޕޯޓް ވެސް އެއްބަސްވުމުގެ ގާއިމުކުރާނެ އެވެ.
އެއާ އެމްބިއުލާންސްގެ ހިދުމަތަށާއި ޓޫރިސްޓުން ވެސް އުފުލަން ރާއްޖޭގައި ހެލިކޮޕްޓަރުގެ ހިދުމަތް ދޭނެ ބަޔަކު ހޯދަން ޓްރާންސްޕޯޓް މިނިސްޓްރީން އެކްސްޕްރެޝަން އޮފް އިންޓަރެސްޓް (އީއައިއޯ) އަށް ހުޅުވީ މި މަހުގެ ކުރީކޮޅު އެވެ.
އީއައިއޯ ހުށަހަޅަން ދިން ސުންގަޑި މި މަހުގެ 19 އަށް ވަނީ ހަމަވެފަ އެވެ.
ނަމަވެސް ދުބާއީގެ ކުންފުންޏަކާ ހެދި އެއްބަސްވުމާ ގުޅޭ ތަފުސީލެއް ސަރުކާރުން އަދި ހާމައެއް ނުކުރެ އެވެ.