ޕްރޮސިކިއުޓާ ޖެނެރަލް ހުސައިން ޝަމީމަށް ހަމަލާދިން މައްސަލައިގެ ތަހުގީގު ނިންމާ ދައުވާކޮށްދިނުމަށްއެދި ޕީޖީ އޮފީހަށް ފޮނުވައިފިއެވެ.
ފުލުހުން މިއަދު ބުނެފައިވަނީ ޕީޖީ ޝަމީމަށް ހަމަލާދިން މައްސަލައާ ގުޅިގެން ހައްޔަރުކުރި 7 މީހުންގެ މައްސަަލައިގައި ތަހުގީގު ނިމިފައިވާ ކަމަށެވެ.
އެ މައްސަލައިގައި ދައުވާ ކޮށްދިނުމަށްއެދި އޮގަސްޓް 18 ވަނަ ދުވަހު ޕީޖީ އޮފީހަށް ފޮނުވާފައިވާ ކަމަށް ފުލުހުން މައުލޫމާތު ދީފައިވެއެވެ.
ފުލުހުން ބުނެފައިވަނީ މި މައްސަލައާ ގުޅިގެން ހައްޔަރުކުރި ހަތް މީހުން ވެސް ތިބީ ފުލުހުންގެ ބެލުމުގެ ދަށުގައި ކަމަށެވެ.
ޕީޖީ ޝަމީމަށް މަރުތޭލައަކުން ހަމަލާދިނުމުން އަތަށް ޒަހަމުތަކެއް ލިބި ހޮސްޕިޓަލުގައި ފަރުވާ ދީފައިވެއެވެ. ޝަމީމަށް ހަމަލާދީފައިވަނީ ޖެނުއަރީ 31 ވަނަ ދުވަހުއެވެ.