ބޭނުން ކުރެވޭ ޑޮލަރު ރިޒާވު ހުސްވި ކަމަށް ބުނެ ފަތުރަމުންދާ ވާހަކައަކީ ދޮގެއް ކަމަށް އިކޮނޮމިކް މިނިސްޓަރު މުހައްމަދު ސައީދު ވިދާޅުވެއްޖެ އެވެ.
މިނިސްޓަރު ސައީދު "އެކްސް"ގައި ކުރެއްވި ޕޯސްޓެއްގައި ވިދާޅުވީ "ބޭނުންކުރެވޭ ޑޮލަރު ރިޒާވު ހުސްވެއްޖެ" ކަމަށް އަދަދު އޮންލައިންގައި މިއަދު ޝާއިޢުކުރި ޚަބަރަކީ ކަނޑައެޅިގެން ބުހުތާނު ދޮގު ޚަބަރެއް ކަމަށެވެ.
"ބޭނުންކުރެވޭ ޑޮލަރު ރިޒާވު ހުސްވެއްޖެ"ކަމަށް އަދަދު އޮންލައިންގައި މިއަދު ޝާއިޢުކުރި ޚަބަރަކީ ކަނޑައެޅިގެން ބުހުތާނު ދޮގު ޚަބަރެއް.
— Mohamed Saeed (@em_saeed) August 21, 2024
އަދަދު އޮންލައިންގައި މިއަދު ޝާއިޢުކުރި ޚަބަރުގައިވާ ގޮތުން މިއަދުގެ ވަގުތެއްގައި ބޭނުންކުރެވޭ ޑޮލަރު ރިޒާވުގައި ހުރި ބާކީ ފައިސާ ކޮޅު އެއްކޮށް ވަނީ ބޭނުންކޮށްފަ އެވެ.
މިދިޔަ ޖުލައި މަސް ނިމުނުއިރު، ވަގުތުން ވަގުތަށް ބޭނުންކުރެވޭ ރިޒާވްގައި 45 މިލިއަން ޑޮލަރު ހުރި ކަމަށް މަރުކަޒީ ބޭންކް، އެމްއެމްއޭ އިން ވަނީ ބުނެފަ އެވެ.
އެމްއެމްއޭ އިން ވަނީ ރާއްޖޭގެ ޓޫރިޒަމާއި ގުޅިފައިވާ އިންޑަސްޓްރީތަކުން މިއަހަރުގެ ބާކީ އޮތް ދުވަސްތަކުގައި ކުރިން ލަފާކުރި ގޮތާ ހިލާފަށް އިތުރު ކުރިއެރުންތަކެއް ލިބޭނެ ކަމަށް އަންދާޒާ ކުރާތީ އޭގެ ހެޔޮ ބަދަލު ރިޒާވަށް ކުރާނެ ކަމަށްވެސް ބުނެފައިވެ އެވެ.
މީގެއިތުރުން ސަރުކާރާއި ސަރުކާރު ހިއްސާވާ ކުންފުނިތަކުގެ ބޭރު ފައިސާގެ މުއާމަލާތްތަކަށް ބޭނުންވާ ފައިނޭންސިން ބޭރުގެ އެކިއެކި ފަރާތްތަކުން ހޯދުމުގެ މަސައްކަތްތަކެއް ސަރުކާރުން ކުރަމުން އަންނަ ކަމަށްވެސް ބުންޏެވެ.