އެއާޕޯޓު ގިނަވި ވަރަކަށް އެތެރޭގެ އުދުހުންތަކުގެ އަގުބޮޑުވާނެ ކަމަށް ޓްރާންސްޕޯޓް މިނިސްޓަރު މުހައްމަދު އަމީން ވިދާޅުވެއްޖެ އެވެ.
ދައުލަތުގެ މީޑިއާގައި ރޭ ވާހަކަދައްކަމުން އަމީން ވިދާޅުވީ ރާއްޖޭގެ ހުރިހާ ދިމާލެއްގައި އެއާޕޯޓު އެޅުމަކީ ދެމެހެއްޓެނިވި ގޮތެއް ނޫން ކަމަށާއި އޭގެ ބަދަލުގައި އެހެން މޮޑެލްއަކަށް ބަދަލުވާންޖެހޭ ކަމަށެވެ. އަދި އެއާޕޯޓު ގިނަވި ވަރަކަށް އެތެރޭގެ އުދުހުދުންތަކުގެ އަގުބޮޑުވާނެ ކަމަށްވެސް އަމީން ވިދާޅުވި އެވެ.
"ޖުމްލަ ގޮތެއްގައި އެއާޕޯޓު ގިނަވި ވަރަކަށް، ފްލައިޓް ގިނަވި ވަރަކަށް އެތެރޭގެ އުދުހުމުގެ އަގު ބޮޑުވާނެ. މިހެން ދެންނެވީމާ ބައެއް ބޭފުޅުން ހަމަ ވަރަށް ސިއްސައިގެން ދާނެ. އެކަމަކު މިއީ މިކަމުގެ ހަގީގަތް،" އަމީން ވިދާޅުވި އެވެ.
އަމީން ވިދާޅުވީ ކައިރިކައިރީގައި އެއާޕޯޓުތައް އެޅި ވަރަކަށް އެތެރޭގެ އުދުހުމުގެ އަގުތައް ދާނީ ބޮޑުވަމުން ކަމަށާއި މިހާ ގިނަ އެއާޕޯޓުތަކަކީ އެއްވެސް ސަރުކާރަކަށް ސަސްޓެއިން ކުރެވޭނެ ކަމެއް ނޫން ކަމަށެވެ. މުޅި އޭވިއޭޝަން ދާއިރާ މުޅިން އެހެން ގޮތަކަށް ބަދަލުވުމާ ދޭތެރޭ އިތުރު ވިސްނުންތަކެއް ގެންނަންޖެހޭ ކަމަށާއި މިއީ މިކަމުގެ ހަގީގަތް ކަމަށްވެސް އަމީން ވިދާޅުވި އެވެ.
އަދި ފަތުރުވެރިކަން ފުޅާވަމުން އަންނަ ވަރަކަށް އޭވިއޭޝަން ދާއިރާ ވެސް ކުރިއަށްދާކަން ފާހަގަކުރައްވަމުން އަމީން ވަނީ އައިލެންޑް އޭވިއޭޝަނުން ބޭނުން ކުރަމުން އައި ޑޭޝް މަރުކާގެ ބޯޓުތައް ދޫކޮށްލައި އޭޓީއާރު ބޯޓުތަކަށް ފްލީޓް ބަދަލު ކުރުމުގެ މަސައްކަތް ހިނގަމުންދާ ކަމަށް ވިދާޅުވެފަ އެވެ. އަދި ސީޕްލޭން އޮޕަރޭޝަންތައް ވެސް ދުވަހުން ދުވަހަށް ފުޅާވަމުންދާ ކަމަށާއި އަދި ހެލިކޮޕްޓަރުގެ ހިދުމަތް ވެސް ފަށަން ތައްޔާރުވަމުންދާކަން އަމީން ފާހަގަކުރެއްވި އެވެ.