ނިމިދިޔަ އެމްޑީޕީގެ ސަރުކާރުގައި ރާއްޖޭގެ ކުދި އަދި މެދުފަންތީގެ ވިޔަފާރިތައް އިނދަ ޖައްސާލި ކަމަށް މަތިވެރި ދާއިރާގެ މެންބަރު ހަސަން ޒަރީރު ވިދާޅުވެއްޖެއެވެ.
ރައްޔިތުންގެ މަޖިލީހުގެ މިއަދުގެ ޖަލްސާގައި ވިޔަފާރި ރަޖިސްޓްރީ ކުރުމުގެ ޤާނޫނަށް އިސްލާހު ގެނައުމުގެ ބިލު ކޮމިޓީން ދިރާސާކުރިގޮތުގެ ރިޕޯޓަށް ވާހަކަ ދައްކަވަމުން މެންބަރު ޒަރީރު ވިދާޅުވީ މިދިޔަ ސަރުކާރުގައި މަސައްކަތްތައް ހަވާލުކުރި ގިނަ ވިޔަފާރިތަކުން ކުރި މަސައްކަތްތަކަށް ފައިސާ ދީފައި ނުވާކަމަށެވެ. އަދި އެއްވެސް މަސައްކަތެއް ނުކުރާ ފަރާތްތަކުގެ އެކައުންޓްތަކަށް ފައިސާ ޖަމާވިކަމަކީ ހަގީގަތެއް ކަމަށް ވިދާޅުވިއެވެ.
ޒަރީރު ވިދާޅުވީ ސަރުކާރަކުން ސީދާ ގޮތެއްގައި ކުދި އަދި މެދުފަންތީގެ ވިޔަފާރިތަކަށް އެންމެބޮޑަށް ޖެއްސުންކުރީ މިދިޔަ ސަރުކާރުގައި ކަމަށެވެ.
"ކުދި ވިޔަފާރިތައް، ނިމިދިޔަ ފަސް އަހަރު ހަމަ އިނދަޖައްސާލީ. ތިމާމީހާ ނުގަބޫލު ނުވަތަ އޭރުހުރި މިނިސްޓަރު ހިއްޕުޅާނުވާ ކުންފުންޏެއް ވިއްޔާ ހުރީ ހުރިހާ ޕޭމަންޓެއް ހިފަހައްޓާފަ." ޒަރީރު ވިދާޅުވިއެވެ.
އޭނަގެ އަމިއްލަ ވިޔަފާރިތަކެއް ހުރިކަން ފާހަގަކޮށް ޒަރީރު ވިދާޅުވީ ނިމުނު 5 އަހަރު ސަރުކާރުގެ އެއްވެސް މަސައްކަތެއް ނަގާފައި ނުވާނެ ކަމަށެވެ. އެއީ މަސައްކަތް ނަގަންދިއުމުން އެކި ނަންނަމުގައި "ކޮމިޝަންތައް" ނަގާތީ ކަމަށާއި، ބައެއްފަހަރު މަސައްކަތުގެ ފައިދާއަށްވުރެ ބޮޑު އެއްޗެއް ކޮމިޝަންގެ ގޮތުގައި ދޭންޖެހޭ ކަމަށެވެ.
މީގެއިތުރުން ޒަރީރު ވަނީ، 130،000 އަދި 150،000 އަށް ކުރެވޭ ދަތުރުތައް މިދިޔަ ސަރުކާރުގައި ފެނަކައިން 3 ލައްކަ އަދި 5 ލައްކައިގައި ވެސް ކޮށްފައިވާ ކަމަށް ތުހުމަތު ކޮށްފައެވެ.