ރާއްޖޭގައި ހެލިކޮޓަރުގެ ޚިދުމަތް ދޭން ޝައުުގުވެރިވާނެ ބަޔަކު ހޯދަން ހުޅުވައިލުމުން ބޭރުގެ 36 ފަރާތަކުން ޝައުގުވެރިކަން ފާޅުކޮށްފައިވާ ކަމަށާއި އަމާޒަކީ ކުރިއަށް އޮތް 10 މަސް ދުވަހުގެ ތެރޭގައި ހިދުމަތް ފެށުން ކަމަށް ޓްރާންސްޕޯޓް މިނިސްޓަރު މުހައްމަދު އަމީން ވިދާޅުވެއްޖެ އެވެ.
ދައުލަތުގެ މީޑިއާ، ޕީއެސްއެމްގައި މިނިސްޓަރު ރޭ ވިދާޅުވީ ހެލިކޮޕްޓަރުގެ ޚިދުމަތް ދޭން ހަމަޖެހިފައި ވަނީ އިނގިރޭސިވިލާތުގެ ރެގިއުލޭޓަރީ ބޮޑީއެއް ކަމަށްވާ، ޔޫކޭ ސިވިލް އޭވިއޭޝަންގެ އެހީގައި ހަދާފައިވާ ޓެކްނިކަލް އެސެސްމަންޓްތަކަކަށް ފަހު ކަމަށެވެ.
އަދި ހުއްދަ ދޭނީ، ސަރުކާރުގެ ބޭނުންތަކަށް ސިއްޙީ ކުއްލި ޙާލަތްތަކާއި ހާދިސާތަކުގެ ޙާލަތުގައި ސާޗް އެންޑް ރެސްކިއުގައި އެހީތެރިކަން ފޯރުކޮށް ދޭން ޖެހޭ ގޮތަށް ކަމަށް ވިދާޅުވި އެވެ.
"މިކަމަށް ބަޔަކު ހޯދަން ގެޒެޓްކުރީމަ ތިރީސް ހަ ފަރާތަކުން ކުރިމަތިލި. ދުނިޔޭގެ އެންމެ ވަރުގަދަ ކުންފުނިތަކުން ކުރިމަތިލި،' އަމީން ވިދާޅުވި އެވެ. "މިހާރު ކުރިއަށް ދަނީ ޚިދުމަތްދޭނެ ފަރާތްތައް ހޮވުމަށް ކުރަންޖެހޭ މަސައްކަތްތައް. ޝެޑިއުލާ އެއްގޮތަށް މިކަން ކުރިއަށް ދާނެ."
މިނިސްޓަރު ވިދާޅުވީ ޚިދުމަތް ދޭން ފަށާނީ ރާއްޖޭގައި ވައިގެ ޚިދުމަތް ދިނުމުގެ ލައިސަންސާއި ސެޓްފިކެޓް އެ ކުންފުނިތަކަށް ލިބުމުންކަމަށެވެ. އަދި މަސައްކަތް ކުރިއަށް ދާނީ ތިން މަރުހަލާއަކަށް ކަމަށް ވިދާޅުވި އެވެ. އޭނަ ވިދާޅުވީ ކެބިނެޓްގައި މަޝްވަރާކުރުމަށް ފަހު ނިންމާފައިވަނީ، ހެލިކޮޕްޓަރުގެ ޚިދުމަތް ދިނުމަށް 10 އަހަރު ދުވަހުގެ ހުއްދައެއް ދޫކުރަން ކަމަށެވެ.
"އެގޮތުން ދިހަ އަހަރުގެ އެކްސްކްލޫސިވް ރައިޓްސް ދޭން ކެބިނެޓުން ނިންމީ، ކޮންމެ ސަރުކާރެއް އޮތަސް މެޑިކަލް އިވަކުއޭޝަން އަދި ސަރޗް އެންޑް ރެސްކިއުއަށް ޚިދުމަތް ދޭން ޖެހޭ ގޮތަށް،: މިނިސްޓަރު ވިދާޅުވި އެވެ. "އެ މީހުންގެ ޚިދުމަތުން ވަކި ގަޑިއިރެއް ސަރުކާރުގެ މިފަދަ މަސައްކަތްތަކަށް ދޭންޖެހޭނެ އޭ. އެ ފަރާތްތަކުގެ ބިޒްނަސް މޮޑެލް ކަނޑައަޅާނީ އެ ބަޔަކު އަމިއްލަ އަށް."
އަމީން ވިދާޅުވި ގޮތުގައި ވިދާޅުވީ ހުއްދަ ދޭ ކުންފުނިތައް ކަނޑައެޅުމަށް ފަހު، ރާއްޖޭގައި އުދުހުމުގެ ހުއްދަ ދޭނީ އެއާ އޮޕަރޭޓަ ސެޓްފިކެޓާ އެކީގަ އެވެ. އަދި އެ މަސައްކަތަށް 6-8 މަސް ހޭދަވާނެ ކަމަށް ވިދާޅުވި އެވެ.
މިނިސްޓަރު ވިދާޅުވީ ޢަމާޒަކީ ކުރިއަށް އޮތް 10 މަސް ތެރޭގައި ރާއްޖޭގައި ހެލިކޮޕްޓަރުގެ ޚިދުމަތް ފެށުން ކަމަށެވެ.
ރާއްޖޭގައި މީގެ އަހަރުތަކެއް ކުރިން ވެސް ހެލިކޮޕްޓަރުގެ ހިދުމަތް "ހަމިންބާޑް" ގެ ނަމުގައި ދީފައިވެ އެވެ.
ޓޫރިސްޓުން ވެސް އުފުލާ ގޮތަށް އެ ހިދުމަތް ރާއްޖޭގައި އަލުން ދޭން ފަށަން ނިންމައި އެކްސްޕްރެޝަން އޮފް އިންޓަރެސްޓް (އީއައިއޯ) ޓްރާންސްޕޯޓް މިނިސްޓްރީން ހުޅުވީ މި މަހުގެ 6 ގަ އެވެ. އަދި އެކަމަށް ދިން ސުންގަޑި ހަމަވީ މި މަހުގެ 19 އަށެވެ.