ރާއްޖޭގެ ސިއްހީ ދާއިރާ އޮތީ އެއްކޮށް ފެއިލް ވެފައި ކަމަށް މީދޫ ދާއިރާގެ މެންބަރު އަހުމަދު ސިޔާމް މުހައްމަދު ވިދާޅުވެއްޖެއެވެ.
ރައްޔިތުންގެ މަޖިލީހުގެ މިއަދުގެ ޖަލްސާގައި ސިއްހީ ހިދުމަތުގެ ޤާނޫނަށް ސަރުކާރުން ހުށަހަޅާފައިވާ އިސްލާހު ކޮމިޓީން ދިރާސާކޮށް ނިންމިގޮތުގެ ރިޕޯޓަށް ވާހަކަ ދައްކަވަމުން ސިޔާމް ވިދާޅުވީ މިދިޔަ 30 ވަރަކަށް އަހަރު ރާއްޖޭގެ ސިއްހީ ދާއިރާ ފެއިލް ވެފައިވާ ކަމަށާއި މިއަދުވެސް ސިއްހީ ދާއިރާ އޮތީ އެއްކޮށް ފެއިލްވެފައި ކަމަށެވެ.
ސިޔާމް ވިދާޅުވީ ހެލްތް ކެއާ ދިވެހި ރައްޔިތުންނަށް ނުލިބޭ ކަމަށާއި ބޮޑެތި އިމާރާތްތައް ހުރިނަމަވެސް ރަނގަޅު ބޭހާއި ވަސީލަތްތައް އަދި ޑޮކްޓަރުން ނުތިބޭ ކަމަށެވެ.
"ބަލިވެގެން ރަށްރަށުން އަންނަ މީހާ ހޮސްޕިޓަލަށް ދިޔައިމާ ވަނީ ހައްތަހާ ބަލި، ބައްޔެއް ރަނގަޅެއް ނުވޭ." ސިޔާމް ވިދާޅުވިއެވެ.
ރާއްޖޭގައި އާސަންދަ ދެނީ ސިއްހީ ދާއިރާ ރަނގަޅު ކުރުމަށްޓަކައިކަން ފާހަގަކޮށް ސިޔާމް ވިދާޅުވީ އާސަންދަ ދިނުމަކުންވެސް އެއްވެސް ފައިދާއެއް ނުކުރި ކަމަށެވެ. އަދި އޭގެންވެސް އެތައްބަޔަކު ވައްކަން ކުރަމުންދާކަމަށް ވިދާޅުވިއެވެ.