82 އިންސައްތަ މަސައްކަތް ނިންމާ ރައްޔިތުންގެ މަޖިލީހުގެ މިދައުރުގެ ފަހު ޖަލްސާ މިރޭ ބޭއްވުމަށް ހަމަޖައްސައިފިއެވެ.
ރައްޔިތުންގެ މަޖިލީހުގެ މިއަދުގެ ޖަލްސާގައި ރިޔާސަތުގައި އިންނެވި ނައިބުރައީސް އަހުމަދު ނާޒިމް ވިދާޅުވީ 28 މޭ 2024 އިން 22 އޮގަސްޓް 2024 ގެ ނިޔަލަށް ރައްޔިތުންގެ މަޖިލީހަށް 23 ބިލެއް ހުށަހެޅިއިރު އޭގެތެރެއިން 12 ބިލެއް ކޮމިޓީގައި އޮތް ކަމަށާއި އަދި 11 ބިލެއްގެ މަސައްކަތް ނިންމާފައިވާ ކަމަށެވެ
މަޖިލީހުގެ މި މުއްދަތުގައި 12 ސުވާލެއް ހުށަހެޅިއިރު އެ 12 ސުވާލުގެ މަސައްކަތްވެސް ނިންމާފައިވާ ކަމަށް ނާޒިމް ވިދާޅުވިއެވެ. އަދި ސަރުކާރުން ހުށަހެޅި 9 މައްސަލައެއް ނިންމާފައިވާ ކަމަށާއި އަދި ރިޔާސަތުން ހުށަހެޅި 13 މައްސަލައެއް ނިންމާފައިވާ ކަމަށްވެސް ވިދާޅުވިއެވެ.
ނާޒިމް ވިދާޅުވީ ރައްޔިތުންގެ މަޖިލީހަށް ހުށަހެޅުނު މަސައްކަތްތަކުން 82.9 އިންސައްތަ މަސައްކަތް ނިންމާފައިވާކަމަށެވެ.
މި ދައުރު ނިންމުމަށް ބާއްވާ ފަހު ޖަލްސާ މިރޭ 09:00 ގައި ބާއްވާނެ ކަމަށްވެސް ނާޒިމް ވިދާޅުވިއެވެ.
މަޖިލީހުގެ ގަވައިދުގައި ބުނެފައިވަނީ މަޖިލީހުގެ ދެވަނަ ދައުރު ހިނގާނީ ޖޫން މަހުގެ ފުރަތަމަ ދުވަހުން ފެށިގެން އޮގަސްޓު މަހުގެ ފަނަރަވަނަ ދުވަހުގެ ނިޔަލަށް ކަމަށެވެ. އަދި މަޖިލިސް ޗުއްޓީއަށް ދިއުމަށްފަހު ތިންވަނަ ދައުރު ހިނގާނީ އޮކްޓޫބަރު މަހުގެ ފުރަތަމަ ދުވަހުން ފެށިގެން ނޮވެންބަރު މަހުގެ ނިޔަލަށެވެ. މަޖިލީހުގެ ފުރަތަމަ ދައުރު ހިންގަނީ ފެބުރުވަރީ މަހުގެ ފުރަތަމަ ދުވަހުން ފެށިގެން މޭ މަހުގެ ފަނަރަވަނަ ދުވަހުގެ ނިޔަލަށެވެ.