ހައްޖު ކޯޕަރޭޝަނުގައި ވަޒީފާ އަދާކުރަމުންދާ ޢަދާލަތު ޕާޓިގެ ޢިލްމުވެރިންގެ މަޖިލީހާއި އަދި މަޝްވަރާ މަޖިލީހުގެ މެންބަރު އައްޝައިޚް ޙުސައިން އަންޞާރަށް ވަޒީފާގެ ބިރު ދައްކަމުންދާ ކަމަށް އެ ޕާޓީން ބުނެފި އެވެ.
އަދާލަތުން ނެރުނު ބަޔާނެއްގައި ބުނީ ޝައިހް އަންޞާރު ވަޒީފާ އަދާކުރަމުންދާ ޙައްޖު ކޯޕަރޭޝަން އިން އޭނާއާ މެދު އެތައް ތަފާތުކުރުމެއް ގެންގުޅެ ވަޒީފާ އަދާ ކުރުމުގައި ނުޙައްގު އެތައް ފިޔަވަޅުތަކެއް އަޅާ އަދި ނުޙައްްޤުން ވަޒީފާއިން ސަސްޕެންޑްކުރި ކުރުން ކުށްވެރިކުރާ ކަމަށެވެ.
ސަރުކާރު ހިންގާ ފަރާތް ބަދަލުވުމުން ސިޔާސީ މަޤާމުތަކުގައި ތިބޭ މުވައްޒަފުން ވަކި ކުރެވުނު ނަމަވެސް ސިޔާސީ ނޫން މަޤާމްތައް ފުރަމުން އަންނަ މުވައްޒަފުންގެ ސިޔާސީ ވިސްނުމާ ފިކުރަށް ބަލައި ބޭއިންސާފުން ކަންކުރެވިގެން ދިއުމަކީ ބަލައިގަންނާނެ ކަމެއް ނޫން ކަމަށް އަދާލަތުން ބުނެ އެވެ.
"މި މައްސަލައިގައި ކަން ހިނގާ ގޮސްފައިވާ ގޮތަށް ބަލާއިރު, އައްޝައިޙްް ޙުސައިން އަންޞާރު ގެ މަޤާމު ދައްކޮށް, މަސައްކަތުން ދުރުކޮށް, ރަސްމީ ގަޑީގައި ދަރިން ސްކޫލަށް ލާން ދިއުމަށް އެހެން މުވައްޒަފުންނަށް ފުރުސަތު ދެވުނު ނަމަވެސް ޝައިޚް އަންޞާރަށް އެ ފުރުސަތު ބަންދުކޮށް, އެކި މަރުޙަލާތަކުގައި ޝައިޚްއާ މެދު ފިޔަވަޅު އަޅާފައިވަނީ ބޭއިންސާފުން ކަމާއި އަދި ފިޔަވަޅު އެޅުމުގައި އެހެން މުވައްޒަފުންނާއި ތަފާތުކުރުން ގެންގުޅެފައިވާކަން ފާހަގަކުރެވެ އެވެ،" އަދާލަތުން ބުނެފައިވެ އެވެ.
އަދާލަތުން ވަނީ މިކަން ބަލައި ޝައިހް އަންޞާރުގެ ގެއްލިފައިވާ ޙައްޤު ހޯދައިދިނުމަށް ރައީސް ޑރ. މުހައްމަދު މުއިއްޒަށާއި ކަމާ ބެހޭ އެންމެހައި ފަރާތްތަކަށް ގޮވާލާފަ އެވެ. އަދި ސަރުކާރު މުއައްސަސާތަކާއި ކުންފުނި ތަކަކީ މުވައްޒަފުންގެ ސިޔާސީ ފިކުރަށް ބަލައި ތަފާތުކުރުން ގެންގުޅޭ ތަންތަން ކަމުގައި ނުވާނެކަން ކަށަވަރުކުރުމަށް ވެސް ގޮވާލާފައިވެ އެވެ.