ފޮރިން މިނިސްޓަރު މޫސާ ޒަމީރު، ސައުދީ ފަންޑް ފޯ ޑިވެލޮޕްމަންޓްގެ ޗީފް އެގްޒެކެޓިވް އޮފިސަރު، ސުލްތާން ބިން އަބްދުއްރަޙްމާން އަލް މަރްޝަދާއި މިއަދު ބައްދަލުކުރައްވައިފި އެވެ.
މިނިސްޓަރު ޒަމީރު "އެކްސް"ގައި ކުރެއްވި ޕޯސްޓެއްގައި ވިދާޅުވީ މި ބައްދަލުވުމުގައި ރާއްޖޭގައި މިހާރު ހިނގަމުންދާ އަދި ކުރިއަށް އޮތްތަނުގައި ހިންގުމަށް ރާވާފައިވާ ޕްރޮޖެކްޓުތަކުގެ މައުލޫމާތު އެރުވި ކަމަށާއި އަދި ރާއްޖެ އަށް އެހީތެރިކަން ބޭނުންވާ އިތުރު ދާއިރާތަކާއި ގުޅޭގޮތުން ވެސް މަޝްވަރާތައް ކުރެވުނު ކަމަށެވެ.
އަދި ސައުދީ ފަންޑުން ރާއްޖެ އަށް ފޯރުކޮށްދެމުންދާ އެހީތެރިކަމަށް ޒަމީރު ވަނީ ޝުކުރު އަދާކުރައްވާފަ އެވެ.
މިނިސްޓަރު ޒަމީރު ސައުދީ އަށް ވަޑައިގެންނެވީ ސައުދީގެ ފޮރިން މިނިސްޓަރު ފައިސަލް ބިން ފަރުހާން އަލް ސައުދުގެ ދައުވަތަކަށެވެ. މި ދަތުރުފުޅުގައި ޒަމީރު ވަނީ ރައީސުލްޖުމްހޫރިއްޔާ ޑރ. މުހައްމަދު މުއިއްޒު، ސަޢޫދީ ޢަރަބިއްޔާގެ ވަލީއަހުދު އަދި ބޮޑުވަޒީރު މުޙައްމަދު ބިން ސަލްމާން ބިން ޢަބްދުލްޢަޒީޒް އަލް ސަޢުދަށް ފޮނުއްވެވި ސިޓީފުޅެއް ސައުދީގެ ފޮރިން މިނިސްޓަރަށް ރައްދު ކުރައްވާފަ އެވެ.
ޒަމީރު ސައުދީއަށް ކުރައްވާ ފަސް ދުވަހުގެ މި ދަތުރުފުޅުގައި ސަޢޫދީ ސަރުކާރުގެ އިސް ވެރިންނާއި ބައްދަލުކުރައްވަމުން ގެންދަވާއިރު، ރިޔާދުގައި ދިރިއުޅޭ ދިވެހިންނާއި ވެސް ވަނީ ބައްދަލުކުރައްވާފަ އެވެ.
މި ދަތުރުފުޅުގައި މި ފަހުން އެމްއެމްއޭގެ ގަވަރުނަރު ކަމަށް އައްޔަންކުރި އަހުމަދު މުނައްވަރު ވެސް ބައިވެރިވެވަޑައިގަންނަވަ އެވެ.