ދުވަސްވީ އަންހެނާގެ ރެކޯޑް އަލުން ޖަޕާން މީހަކަށް

ދުނިޔޭގައި މި ވަގުތު ހުރި އެންމެ ދުވަސްވީ އަންހެނާގެ ރެކޯޑް އަނެއްކާ ވެސް ޖަޕާން މީހަކަށް ލިބިއްޖެ އެވެ.

ކުރިން ވެސް ގިނަ ދުވަސްތަކެއް ވަންދެން އެ ރެކޯޑް އެ ގައުމުގެ މީހަކު ދަމަހައްޓަމުން އައިސްފައިވެ އެވެ. އެއީ އެޕްރީލް 19، 2022 ގައި މަރުވި ކާނޭ ޓަކާނާ އެވެ. އޭނަ މަރުވި އިރު، އުމުރަކީ 119 އެވެ. ކާނޭ އަށް ފަހު ޖަޕާންގެ މީހަކަށް އެންމެ ދުވަސްވީ އަންހެނާފގެ ރެކޯޑް އަލުން މި ލިބުނީ އެ ރެކޯޑް އެންމެ ފަހުން އޮތް ސްޕެއިންގެ ބްރަޔަންސް މޮރޭރާ މި މަހުގެ 19 ގައި މަރުވުމާ ގުޅިގެންނެވެ. އޭނަ މަރުވި އިރު އުމުރަކީ 117 އަހަރާއި 168 ދުވަހެވެ.

ރެކޯޑް މި ފަހަރު ލިބުނު މީހާ އަކީ އުމުރުން 116 އަހަރުގެ ޓޮމިކޯ އިޓޫކާ އެވެ. އޭނަ އުފަންވީ މެއި 23، 1908 ގަ އެވެ. ޓޮމިކޯ އަކީ 2019 އިން ފެށިގެން ޖަޕާންގެ އަޝިއާ ސިޓީގެ ދުވަސްވީ މީހުން ބަލަހައްޓާ މަރުކަޒެއްގައި އުޅެމުން އަންނަ މީހެކެވެ.

އަޑު އިވުމުގައި މައްސަލަތަކެއް ހުރުން ފިޔަވައި ޓޮމިކޯގެ ސިއްހީ މާ ބޮޑެތި މައްސަލަތަކެއް ނެތެވެ. އަދި އޭނަ އެންމެ ގަޔާވަނީ ދޮންކޭލަށެވެ. ޓޮމިކޯގެ އެންމެ ޒުވާން އުމުރުގައި ކޮށް އުޅުނު މަސައްކަތަކީ ފިރިމީހާގެ ފޮތި ފެކްޓްރީގެ އިދާރީ މަސައްކަތްތައް ބެލެހެއްޓުމެވެ.

އޮސާކާ އަށް އުފަން ޓޮމިކޯ އުމުރުން 20 އަހަރުގައި ކައިވެނިކޮށް ހަތަރު ދަރިން ލިބުނެވެ. އެއީ ދެ ފިރިހެން ކުދިންނާއި ދެ އަންހެން ކުދިންނެވެ. އަދި އޭނަ އަށް މާމަ އަދި މުނިމާމަ ކިޔާ ގިނަ ކުދިންތަކެއް ވެސް އެބަތިއްބެވެ.

ޓޮމިކޯގެ ފިރިމީހާ ވަނީ މީގެ 45 އަހަރު ކުރިން 1979 ގައި މަރުވެފަ އެވެ.