އަންނަ މަހު ސްރީލަންކާގައި ބާއްވާ ރިޔާސީ އިންތިހާބުގައި ވާދަކުރައްވާ ކެންޑިޑޭޓަކު މަރުވެއްޖެ އެވެ.
މަރުވެފައިވަނީ އަމިއްލަ ގޮތުން އިންތިހާބުގައި ވާދަކުރަން ފޯމު ހުށަހަޅާފައިވާ މުހައްމަދު އިލްޔާސް އެވެ. އިލްޔާސް މަރުވީ ކުއްލިގޮތަކަށް ބަލިވެގެން ކަމަށް ރިޕޯޓުތައް ބުނެ އެވެ.
ލަންކާގެ ގާނޫނު ހަދާ މަޖިލީހުގެ މެމްބަރުކަން ވެސް ކުރިން ކުރެއްވި އިލްޔާސް އަކީ ސްރީލަންކާ މުސްލިމް ކޮންގްރެސްގެ މެމްބަރެއްގައި ގޮތުގައި ވެސް ކުރިން މަސައްކަތް ކުރެއްވި ބޭފުޅެކެވެ.
ލަންކާގެ ރިޔާސީ އިންތިހާބުގައި ވާދަކުރަން 39 ކެންޑިޑޭޓަކު ފޯމު ހުށަހަޅާފައިވެ އެވެ. މިއީ ލަންކާގެ ތާރީހުގައި މިހާ ގިނަ އަދަދެއްގެ ކެންޑިޑޭޓުން ވާދަކުރާ ފުރަތަމަ އިންތިހާބެވެ. އެ ގައުމުގައި އެންމެ ފަހުން 2019 ގައި ބޭއްވި ރިޔާސީ އިންތިހާބުގައި ވާދަކުރެއްވީ 35 ކެންޑިޑޭޓެކެވެ.
މި ފަހަރުގެ އިންތިހާބުގައި ވާދަކުރައްވާ މަޝްހޫރު ބޭފުޅުންގެ ތެރޭގައި މިހާރުގެ ބޮޑުވަޒީރު ރަނިލް ވިކްރަމަސިންހަ އާއި ލަންކާގެ އެންމެ ނުފޫޒު ގަދަ ސިޔާސީ އާއިލާ، ރާޖަޕަކްސާ އާއިލާ އަށް ނިސްބަތްވާ ނަމާލް ރާޖަޕަކްސާ ހިމެނެ އެވެ. ކުރިން މިނިސްޓަރުކަމާއި ގާނޫނު ހަދާ މަޖިލީހުގެ މެންބަރުކަން ވެސް ކުރެއްވި ނަމާލަކީ ކުރީގެ ބޮޑުވަޒީރު މަހިންދަ ރާޖަަޕަކްސާގެ ދަރިކަލެކެވެ.
ލަންކާގެ ރިޔާސީ އިންތިހާބު އޮންނާނީ އަންނަ މަހުގެ 21 ގަ އެވެ. މި އިންތިހާބުގައި 1.7 މިލިއަން މީހުންނަށް ވޯޓްލުމުގެ ހައްގު ލިބިގެންވެ އެވެ.