ސަނީ ޑިއޯލްގެ "ބޯޑާ 2" ގައި ވަރޫން ދަވަން ހިމެނޭކަން މިއަދު ރަސްމީކޮށް، އިއުލާންކޮށް ފިލްމު ރިލީޒްކުރާ ތާރީހު އިއުލާންކޮށްފި އެވެ.
ބުޝަން ކުމާރުގެ ޓީ ސީރީޒާއި 1997 ގެ "ބޯޑާ" ޑައިރެކްޓްކޮށް، ޕްރޮޑިއުސްކުރި ޖޭޕީ ދައްތާގެ ކުންފުނި ޖޭޕީ ފިލްމްސް ހަދަން ތައްޔާރީތައްވަމުން އަންނަ ފިލްމު ސިނަމާތަކަށް ގެންނަން ތާވަލުކުރީ ޖެނުއަރީ 23، 2026 ގަ އެވެ.
"ބޯޑާ 2" ގެ ކާސްޓްގައި ވަރޫން ހިމެނޭކަން މިއަދު ހާމަކުރީ އޭނަ މި ފިލްމުން ފެންނާނެ މިދިޔަ ހަފުތާގައެއް ބައެެއް މީޑިއާތަކުން ރިޕޯޓްކޮށްފައި ވަނިކޮށެވެ. ނަމަވެސް ކުރިން އަޑުއަރާފައިވާ ގޮތަށް މީގެ ކާސްޓްގައި އަޔޫޝްމަން ކްރާނީ ހިމެނޭނެ ނުވަތަ ނޫން ކަމެއް އަދިވެސް ސާފެއް ނުވެ އެވެ.
"ބޯޑާ 2" ގެ ޑައިރެކްޓްކުރާނީ 2019 ގެ ތާރީހީ ހަނގުރާމަ ފިލްމު "ކޭސަރީ" ގެނެސްދިން އަނޫރާގް ސިންގް އެވެ.
"ބޯޑާ" އަކީ ހިންދީ ސިނަމާގެ އެންމެ ކާމިޔާބު އެެއް ހަނގުރާމަ ފިލްމެވެ. މި ފިލްމަކީ އިންޑިއާ އާއި ޕާކިސްތާނުން 1971 ގައި ކުރި ލޮނގެވާލާ ހަނގުރާ އަށް ބިނާކޮށް ގެނެސްދިން ފިލްމެވެ. މީގެ ކާސްޓްގައި ސަނީގެ އިތުރުން ސުނިލް ޝެޓީ، އަކްޝޭ ކަންނާ ޖެކީ ޝްރޮފް، ޕޫޖާ ބަޓް، ތައްބޫ، ރާކީ، ޕުނީތު އިސާރު އަދި ސުދޭޝް ބެރީ ފަދަ ތަރިން ހިމެނެ އެވެ.
ނަމަވެސް ސަނީ ފިޔަވައި ކުރީގެ ކާސްޓްގެ އިތުރު އެއްވެސް ތަރިއަކު "ބޯޑާ 2" ގައި އަދި ހިމަނައިފައެއް ނުވެ އެވެ.