މިދިޔަ އަހަރު ޝާހްރުކް ޚާންގެ "ޑަންކީ" ގެނެސްދިން ޑައިރެކްޓަރު ރާޖްކުމާރު ހިރާނީ ހިއްސާވެގެން ހަދާ ފުރަތަމަ ވެބް ސީރީޒްގެ ނަމަކީ "ޕްރިތަމް ޕެޑްރޯ" ކަމަށާއި މީގެ ޝޫޓިން އަންނަ ނޮވެމްބަރު މަހުގެ ތެރޭގައި ފަށަން ތައްޔާރުވަމުން އަންނަ ކަމަށް ރިޕޯޓްތައް ބުނެފި އެވެެ.
ޕިންކްވިލާ އިން ބުނީ މި ސައިބަ-ކްރައިމް ތުރިލާގެ މައިގަނޑު ކާސްޓުންނަކީ ވިކްރާންތު މަސީ އާއި އަރުޝަރު ވަރްސީ ކަމަށެވެ.
"ޕްރިތަމް ޕެޑްރޯ" އެ ނަމަކީ އެ މީހުން ކުޅޭ ކެރެކްޓާތަކުގެ ނަންތައް ކަމަށް ވެސް އެ ނޫހުން ބުންޏެވެ. އަރުޝަދު ކުރިން ހިރާނީ ޑައިރެކްޓްކުރި ދެ ފިލްމެއްގައ މަސައްކަތްކުރި އެވެ. އެއީ 2003 ގެ "މުންނާބާއީ އެމްބީބީއެސް" އާއި 2006 ގެ "ލަގޭ ރަހޯ މުންނާބާއީ" ގަ އެވެ.
ޑިޒްނީ ޕްލަސް ހޮޓްސްޓާއާ ގުޅިގެން ހަދަން ނިންމާފައިވާ "ޕްރިތަމް ޕެޑްރޯ" ޑައިރެކްޓަރަކީ ހިރާނީއާ އެކީ މިހާތަނަށް އެސިސްޓަންޓް ޑައިރެކްޓަރެއްގެ ގޮތުގައި މަސައްކަތް ކުރަމުން އައި އާމިރު ސަތިއަވީރް އެވެ.
މިހާތަނަށް މޮޅު އަދި ވަރަށް ކާމިޔާބު ފިލްމުތަކެއް ގެނެސްދީފައިވާ ހިރާނީ ވެބް ސީރީޒެއް ހަދަން އުޅޭކަން އެނގުނު ހިސާބުން ގިނަ ބަޔަކު އަންނަނީ އެއަށް އިންތިޒާރު ކުރަމުންނެވެ. ސަބަބަކީ އޭނަގެ އުފެއްދުމެއް ކަމަށްވާ ނަމަ އޮއްޓަރު ހުރެފައި، ހުރިހާ ގޮތަކުން ވެސް ކޮލިޓީވާނެތީ އެވެ.
ހިރާނީ ޑައިރެކްޓްކުރި ފިލްމުތަކުގެ ތެރޭގައި "ސަންޖޫ"، "ޕީކޭ" އަދި "3 އިޑިއަޓްސް" ވެސް ހިމެނެ އެވެ.