ރާއްޖޭގައި އިސްލާމްދީނުގެ ކަންތައްތައް ދެމެހެއްޓުމަށްޓަކާ ނަސްރު ދޭނޭ ސަރުކާރެއް ގާއިމުވެފައިވާ ކަމަށް އިސްލާމިކް މިނިސްޓަރު ޑރ. މުހައްމަދު ޝަހީމް އަލީ ސައީދު ވިދާޅުވެއްޖެ އެވެ.
އިސްލާމިކް މިނިސްޓްރީން ކުރިއަށް ގެންދާ ރާއްޖޭގެ ދީނީ އިލްމުވެރިންގެ އަހަރީ ބައްދަލުވުން ފެށުމަށް ރޭ އިސްލާމީ މަރުކަޒު ގައި އޮތް ބައްދަލުވުމުގައި ވާހަކަދައްކަމުން ޝަހީމް ވިދާޅުވީ މި ސަރުކާރަށް މިވީ 9 މަސް ދުވަހުގެ ތެރޭގައި ރާއްޖޭގައި އިސްލާމްދީނުގެ ކަންކަން ހަރުދަނާކުރެއްވުމަށް ރައީސް ޑރ. މުހައްމަދު މުއިއްޒު އިރުޝާދުތައް ދެއްވާފައިވާ ކަމަށާއި އިސްލާމިކް މިނިސްޓްރީން ހާސިލުކުރަމުންދާ ކާމިޔާބީގެ ފަހަތުގައި ހުންނެވި އެންމެ ބޮޑު އެއް ހިއްސާދާރަކީ ރައީސް މުއިއްޒު ކަމަށެވެ.
އަދި މި ދުވަސްވަރަކީ އިސްލާމްދީނުގެ ހިދުމަތް ރާއްޖޭގައި ފުޅާކުރުމަށް ހަޔާތުގައި ލިބޭނެ ވަރަށް އަގުހުރި ފުރުސަތެއް ކަމަށްވެސް ޝަހީމް ވިދާޅުވި އެވެ.
"އެހެނީ ދިވެހިރާއްޖޭގައި އިސްލާމްދީނުގެ ކަންތައްތައް ދެމެހެއްޓުމަށްޓަކާ ނަސްރު ދޭނޭ ސަރުކާރެއް މާތްﷲގެ އިރާދަކުރެެއްވިއްޔާ ދިވެހިރާއްޖޭގައި ގާއިމުވެފައި އޮތް އޮތުން،" ޝަހީމް ވިދާޅުވި އެވެ.
ރާއްޖޭގައި ދީނުގެ ކަންކަން ހަރުދަނާކުރުމަށް އިސްލާމިކް މިނިސްޓްރީގެ ފަރާތުން ވަރަށް ގިނަ ކަންކަން ކުރަމުންދާ ކަމަށާއި އޭގެތެރެއިން ކިތަންމެ ކަމެއްގެ އެންމެ ބޮޑު ބައިވެރިންނަކީ އިލްމުވެރިން ކަމަށް ޝަހީމް ވިދާޅުވި އެވެ. އިސްލާމިކް މިނިސްޓްރީން ވަކި އިލްމުވެރިއަކަށް ވަކި ގޮތެއް ނުހަދާނެ ކަމަށާއި ހުރިހާ އިލްމުވެރިން ވެސް މިނިސްޓްރީއާ މެދު ބަހައްޓަވާ ގާތްކަން ޝަހީމް ވަނީ ފާހަގަކުރައްވާފަ އެވެ.