ޒާތީވެ، ތުއްތު ދަރިފުޅުގެ ތައުލީމީ ހަޔާތް ނުތަނަވަސްކަމުގެ ތެރެއަށް ވައްޓާލާފައިވާ ކަމަށް އިކޮނޮމިކް މިނިސްޓަރު މުހައްމަދު ސައީދު ވިދާޅުވެއްޖެ އެވެ.
ސައީދު މިހެން ވިދާޅުވީ "ހަސަން ކުރުސީ"ގެ ނަމުގައި އެކްސްގައި ހަރަކާތްތެރިވަމުންދާ އެކައުންޓުން ސައީދުގެ ދަރިފުޅާއި ގުޅުވައިގެން ދައްކާފައިވާ ވާހަކަތަކަކާ ގުޅިގެންނެވެ. އެގޮތުން އެ އެކައުންޓުން ކުރި ޕޯސްޓެއްގައި ވަނީ އަޖިއަލް އިންޓަނޭޝަނަލް ސްކޫލުގައި ކިޔަވަމުންދާ ސައީދުގެ ދަރިފުޅާމެދު އަމަލު ކުރި ގޮތާއި މެދު ހިތްހަމަނުޖެހިގެން އެ ސުކޫލުގައި މަސައްކަތް ކުރާ އިނގިރޭސިވިލާތުގެ ޓީޗަރެއް ޑީޕޯޓްކުރަން ސައީދު މަސައްކަތް ކުރާ ކަމަށް ތުހުމަތުކޮށްފަ އެވެ.
އެކަމާ ގުޅިގެން ސައީދު ވިދާޅުވީ ސިޔާސީ ގޮތުން އޭނާއާ މެދު ފާޑު ކިޔުމަކީ މައްސަލައެއް ނޫން ކަމަށެވެ. ނަމަވެސް ހަސަން ކުރުސީގެ ނަމުގައި ފިލާތިބެ ބަޔަކު ޒާތީވެ، އޭނާގެ 4 އަހަރުގެ ތުއްތު ދަރިފުޅުގެ މުޅި ތަޢުލީމީ ޙަޔާތް ނުތަނަވަސްކަމުގެ ތެރެއަށް ވައްޓާލާފައިވާ ކަމަށް ސައީދު ވިދާޅުވި އެވެ. އަދި މިފަދަ ދޮގު ޚަބަރުތައް ފެތުރުމަކީ ނާތަހުޒީބު ޢަމަލެއް ކަމަށްވެސް ސައީދު ވިދާޅުވި އެވެ.
ހަސަން ކުރުސީ އެކައުންޓް ހިންގުމުގެ ފަހަތުގައިވާ މީހަކު ހޯދަން ފުލުހުން މީގެ ކުރިން ވަނީ ކޯޓު އަމުރެއް ވެސް ހޯދައިފަ އެވެ. އެ އަމުރު ކޯޓުން ނެރެ ދީފައި ވަނީ ކުރީގެ ރައީސް މުހައްމަދު ނަޝީދު ފުލުހަށް ހުށަހަޅުއްވާފައިވާ މައްސަލައަކާއި ގުޅިގެންނެވެ.