ކުރީގެ ރައީސް ޑރ. މުހައްމަދު ވަހީދު ހަސަން މަނިކުގެ ކާފަދަރިއެއް ކަމަށްވާ އިޖާޒު ވަހީދު ގުޑްރިޗަށް، އިނގިރޭސިވިލާތުގައި ހުންނަ ދިވެހި ހައި ކޮމިޝަންގެ ސެކަންޑް ސެކްރެޓަރީގެ މަގާމު ދީފި އެވެ.
އެނގިފައިވާ ގޮތުގައި އޭނަ އަށް އެ މަގާމު ދިނީ މިދިޔަ މަހުގެ ތެރޭގަ އެވެ. އިޖާޒަކީ ކިންގްސް ކޮލެޖް ލަންޑަނުން ރިލިޖަން، ޕޮލިޓިކްސް އެންޑް ސޮސައިޓީން ބީއޭ ހާސިލުކުރައްވާފައިވާ ބޭފުޅެކެވެ.
އިނގިރޭސިވިލާތުގައި ހުންނަ ރާއްޖޭގެ އެމްބަސީގެ އިސް މަގާމެއް އިޖާޒަށް ދިން އިރު، މި ސަރުކާރުގައި އޭނަ ފުރަތަމަ އަދާކުރެއްވީ ފޮރިން މިނިސްޓްރީގެ ސީނިއާ ޕޮލިޓިކަލް ޑިރެކްޓަރުގެ މަގާމުގަ އެވެ. އެ މަގާމަށް އިޖާޒު އައްޔަންކުރީ އެޕްރީލް މަހުގެ ތެރޭގަ އެވެ.
ހަރަދުތައް ކުޑަކުރަން ސިޔާސީ މަގާމުތައް މަދުކުރާނެ ކަމަށް ސަރުކާރުން ބުނި ނަމަވެސް އެ މަންޒަރު ނުުފެންނަ ގިނަ ބަޔަކު ފާހަގަކުރެ އެވެ.