ރާއްޖެ އާއި އޮސްޓްރޭލިއާއާ ދެމެދު ގުޅުން ބަދަހިކުރުމަށްޓަކައި ޖަމިއްޔާއެއް އުފައްދައިފި އެވެ.
ކުރީގެ މިނިސްޓަރުންތަކެއް އިސްކޮށް ތިއްބަވައިގެން އުފެއްދެވި ޖަމިއްޔާގެ ނަމަކީ "އޮސްޓްރޭލިއާ-މޯލްޑިވްސް ފްރެންޑްޝިޕް އެސޯސިއޭޝަން" އެވެ.
ޖަމިއްޔާގެ މުއައްސިސުންނަކީ ޑރ. އިބްރާހިމް ހަސަނާއި ކުރީގެ ހެލްތު މިނިސްޓަރު ޑރ. މަރިޔަމް ޝަކީލާ އާއި ކުރީގެ ޓޫރިޒަމް މިނިސްޓަރު އަދި މިހާރު ފޮރިން މިިނިސްޓްރީގެ ސްޓޭޓް މިނިސްޓަރު ޑރ. މަރިޔަމް ޒުލްފާ އާއި ޑރ. އާރިފް މުހައްމަދާއި ޑރ. އާމިނަތު މުހައްމަދުދީދީ އާއި އާމިނަތު ސަލާހްގެ އިތުރުން ފަޔާޒް މަންސޫރެވެ.
ޖަމިއްޔާގެ ހިންގާ ކޮމިޓީއަށް މިހާރު ވަނީ މެންބަރުން ވެސް އިންތިހާބުކޮށްފަ އެވެ. އެގޮތުން ހިންގާ ކޮމެޓީގެ ރައީސަކަށް އިންތިހާބު ކޮށްފައިވަނީ ކުރީގެ ހަޔާ އެޑިއުކޭޝަން މިނިސްޓަރު ޑރ. އިބްރާހިމް ހަސަނެވެ. އަދި ނައިބު ރައީސް ކަމަށް އިންތިހާބުކުރީ އައިމިނަތު ސަލާހެވެ.
"އޮސްޓްރޭލިއާ-މޯލްޑިވްސް ފްރެންޑްޝިޕް އެސޯސިއޭޝަން" އިން ބުނިގޮތުގައި ޖަމްއިއްޔާގެ މައިގަނޑު މަގުސަދަކީ އޮސްޓްރޭލިއާ އާއި ރާއްޖެއާ ދެމެދު އޮންނަ ގުޅުން އިތުރަށް ބަދަހި ކުރުމާއި އެކި ދާއިރާތަކުން ކަމާބެހޭ ފަރާތްތަކަށް އެހީތެރިވުމެވެ.
ޖަމިއްޔާ އިން ހިންގަން ހަމަޖެހިފައިވާ ހަރަކާތްތަކުގެ ތެރޭގައި ދަރިވަރުންނާއި ވޮލަންޓިއަރުންގެ ދެމެދު އެކްސްޗޭންޖް ޕްރޮގްރާމްތައް ހިންގުމާއި ކުޅިވަރާއި އެހެނިހެން ސަގާފީ އަދި އިޖުތިމާއީ ހަރަކާތްތަކާއި ވިޔަފާރި އާއި އިންވެސްޓްމަންޓްތައް ކުރިއަރުވަން މަސައްކަތް ކުރުން ހިމެނެ އެވެ.