މި އަހަރު ބ. ކަމަދޫގެ ބޮޑު އީދުގެ ހަރަކާތްތެރެއިން ގިނަ ބައެއްގެ ސަމާލުކަން ލިބުނު އައިމިނަތު ޒާރާ އާއި އަހުމަދު ސިޔާމު މުހައްމަދު (ސަން ސިޔާމު) މި އަހަރުގެ އޮކްޓޯބަރު މަހު ކައިވެނި ކުރަން ނިންމާފައިވާ ކަމަށް ރިޕޯޓްތައް ބުނެފި އެވެ.
ބައެއް މީޑިއާތަކުން ބުނީ އެ ދެ މީހުން ކައިވެނި ކުރަން ހަމަޖެހިފައި ވަނީ އޮކްޓޯބަރު 10 ގައި ކަމަށެވެ،
ޒާރާއާ އެއް އުމުރުގެ ދަރިންތަކެއް ވެސް ތިބި މަޝްހޫރު ވިޔަފާވެރިޔާ، ޒާރާއާ އިންނަން ހުށަހެޅުމުން އޭނަގެ އިތުރުން ޒާރާގެ އާއިލާ އިން ވެސް އެކަމަށް ވަރަށް ގަބޫލު ކަމަށް މީޑިއާތަކުން ބުންޏެވެ. އަދި ސިޔާމްއާ ޒާރާ ކައިވެނި ކުރަނީ ރަނަކަށް ދެ ގެސްޓްހައުސް ހުށަހަޅައިގެން ކަމަށް ވެސް ބައެއް ނޫސްތަކުން ބުނެފައިވެ އެވެ.
ޒާރާއާ ސިޔާމު އިންނަން އުޅޭ ވާހަކަ ދެކެވެމުން އަންނަ އިރު، ކަމަދޫގެ ހުރިހާ ރައްޔިތުންނަށް ރާއްޖެ އާއި ރާއްޖެ އިން ބޭރުން ބޭސް ފަރުވާގެ ހިދުމަތް ސިޔާމު ދެއްވާ ގޮތަށް ހަމަޖެހިފައިވެ އެވެ. މިކަން މިދިޔަ ހަފުތާގައި އެ ރަށު ކައުންސިލުން ވެސް އިއުލާންކޮށްފައިވެ އެވެ.
ރާއްޖޭގެ ރިސޯޓް ވިޔަފާރީގައި އެންމެ ފާހަގަކޮށްލެވޭ ބޭފުޅުންގެ ތެރޭގައި ހިމެނޭ ސިޔާމަކީ ރައްޔިތުންގެ މަޖިލީހުގެ ދ. މީދޫ ދާއިރާގެ މެންބަރެވެ. އަދި އޭނަ އަކީ މިހާރުގެ ސަރުކާރު ހިންގާ ޕާޓީ، ޕީއެންސީގެ ކޯލިޝަން ބައިވެރިއެއް ކަމަށްވާ މޯލްޑިވްސް ޑިވެލޮޕްމަންޓް އެލައިންސް (އެމްޑީއޭ) ގެ ލީޑަރެވެ.
ޒާރާ އަށް ގިނަ ބައެއްގެ ސަމާލުކަން ހުއްޓުނީ ބޮޑު އީދު ތެރޭގައި ކަމަދޫގައި ބޭއްވި ނެށުމުގެ ހަރަކާތްތަކުގެ ތެރެއިންނެވެ. އެގޮތުން އޭނަގެ ރީތިކަމުގެ ޖާދޫގައި އެތައް ބަޔަކު ޖެހުނު ވާހަކަ އެކިއެކި މީޑިއާތުކުން ގެނެސްދީފައިވެ އެވެ.