ނޮވެމްބަރު މަހު ބެލުންތެރިންނަށް ގެނެސްދޭން ހަމަޖެހިފައިވާ ފިލްމު "މެޓްރޯ…އިން ދިނޯ" ގެ ޝޫޓިން ނިންމާލައިފި އެވެ.
ޓީ ސީރީޒުން ޕްރޮޑިއުސްކޮށް، އަނޫރާގް ބާސޫ ޑައިރެކްޓްކުރި މި އެންތޮލޮޖީ ސިނަމާތަކަށް ގެންނަން ހަމަޖެހިފައި ވަނީ ނޮވެމްބަރު 29 ގަ އެވެ. ދެހާސް ބާވީހުގައި "މެޓްރޯ…އިން ދިނޯ" އިއުލާންކުރީ އެ އަހަރުގެ ޑިސެމްބަރު 8 ގައި ބެލުންތެރިންނަށް ގެނެސްދޭ ގޮތަށެވެ. ނަމަވެސް ފަހުން މި އަހަރަށް ފިލްމު ފަސްކޮށް، މާޗް 29 ގައި ރިލީޒްކުރަން ވެސް ތާވަލުކުރި އެވެ.
"މެޓްރޯ…އިން ދިނޯ" އަކީ އަނޫރާގް 2007 ގައި ގެނެސްދިން "އަ ލައިފް އިން…މެޓްރޯ" އާ ގުޅުވައިގެން ގެނެސްދޭ ފިލްމެކެވެ. "މާޑާ" އާއި "ބަރްފީ" ފަދަ ކާމިޔާބު ފިލްމުތައް ގެނެސްދިން ޑައިރެކްޓަރުގެ އެންމެ ފަހުގެ ފިލްމަކީ ވެސް އެންތޮލޮޖީއެކެވެ. އެއީ 2020 ގެ "ލޫޑޯ" އެވެ.
"މެޓްރޯ…އިން ދިނޯ" ގެ ކާސްޓްގައި ހިމެނެނީ އަދިތިޔާ ރޯއި ކަޕޫރް، ސާރާ އަލީ ޚާން، ފާތިމާ ސަނާ ޝެއިހް، އަނޫޕަމް ކޭރް، އަލީ ފަޒަލް، ނީނާ ގުޕްތާ އަދި ޕަންކަޖް ޓްރިޕާތީ އެވެ. މީގެ އިތުރުން "އަ ލައިފް އިން…މެޓްރޯ" ގެ ރޯލެއް ކުޅުނު ކޮންކޮނާ ސެން ޝަރުމާ ވެސް އާ ފިލްމުގައި ހިމެނެ އެވެ.