ޓިކްޓޮކްގައި އާންމުކޮށްފައިވާ ކިއުކަމްބާ ސެލެޑެއްގެ ރެސިޕީއަކާ ގުޅިގެން އައިސްލޭންޑްގައި ކިއުކަމްބާ އަށް އޮތް ޑިމާންޑް ބޮޑުވެ، ސަޕްލައި އަށް ބާރުބޮޑުވެއްޖެ އެވެ.
އެ ގައުމުގެ ސުޕަމާކެޓްތަކުން ބުނެފައި ވަމީ މީގެ ކުރިން ދުވަހަކު ބެސް ކިއުކަމްބާ ނުގަންނަ މިންވަރަށް މީހުން މިހާރު ކިއުކަމްބާ ގަންނަ ކަމަށެވެ. މީގެ ސަބަބުން ސްޓޮކްގައި ހުރި ކިއުކަމްބާ ވަރަށް އަވަހަށް، ހުސްވެ، ޑިމާންޑާ އެއްވަރަށް ސަޕްލައި ހޯދަން ވެސް ދަތިވެފައިވާ ކަމަށް ސުޕަމާކެޓްތަކުން އަންނަނީ ބުނަމުންނެވެ.
އައިސްލޭންޑްގައި ކިއުކަމްބާގެ ވިޔަފާރި ކުއްލިއަކަށް އެހާ ބޮޑަށް މައްޗަށް އަރައިފެން ދިޔައީ ޓިކްޓޮކް ގެނެސްދީފައިވާ ރެސިޕީ ތަޖުރިބާކުރަން ގިނަ ބަޔަކު ކިއުކަމްބާ ގަންނަން ކިއުތައް ހަދަން ފެށުމުންނެވެ. އެ ރެސިޕީގައިވާ ގޮތުން މި ސެލެޑް ހަދަން ބޭނުން ވަނީ ކިއުކަމްބާ އާއި ސެސެމީ އޮއިލާއި ލޮނުމެދާއި ރައިސް ވިނިގާގެ އިތުރުބް ޗިލީ އޮއިލެވެ.
މި ރެސިޕީގެ ރަހަގަނޑުގައި އައިސްލ؛ޭންޑްގެ ގިނަ ބަޔަކު ޖެހި، ކިއުކަމްބާ ވިއްކާ ތަންތަނުގައި ކިއު ބޮޑުވެ، މިހާރު މި ވިޔަފާރޮ ވަނީ "ރަނަށް" ބަދަލުވެފަ އެވެ.
"މިއީ މީގެ ކުރިއަކުން އައިސްލޭންޑުން ފެނުނު ޓްރެންޑެއް ނޫން. ކިއުކަމްބާގެ ވިޔަފާރި ވަނީ އެތައް ގުނައަކުން އުފުލިފައި." ސުޕަމާކެޓެއް ޗެއިނެއް ކަމަށްވާ ހެގްކޯޕް އިން ބުންޏެވެ.
އައިސްލޭންސްގެ ދަނޑުވެރިންގެ ޖަމިއްޔާ، ހޯޓިކަލްޗަރިސްޓްސް ސޭލްސް ކޮމްޕެނި އެސްއެފްޖީ) އިން ބުނީ ޑިމާންޑާ އެއްވަރަށް މިހާރު ކިއުކަބްމާ ސަޕްލައިކޮށް ދޭން ދަތިވެފައިވާ ކަމަށެވެ. އެހެންވެ ކިއުކަމްބާ އުފައްދާ މިންވަރު ވަރަށް ބޮޑަށް އިތުރު ކުރަން ޖެހިފައިވާ ކަމަށް ބުންޏެވެ.