ގައުމުގެ މާލިއްޔަތު އަނދަވަޅަކަށް ވައްޓައިލީ އެމްޑީޕީން ކަމަށް އިކޮނޮމިކް މިނިސްޓަރު މުހައްމަދު ސައީދު ވިދާޅުވެއްޖެ އެވެ.
ސައީދު މިހެން ވިދާޅުވީ ބޭންކް އޮފް މޯލްޑިވްސްއަށް ސަރުކާރުން ނުފޫޒު ފޯރުވުން ހުއްޓާލުމަށް އިދިކޮޅު އެމްޑީޕީ ގެ ޗެއާޕާސަން ފައްޔާޒު އިސްމާއީލް ގޮވާލުމާ ގުޅިގެންނެވެ.
ކުރީގެ އިކޮނޮމިކް މިނިސްޓަރު ފައްޔާޒަށް ރައްދު ދެއްވަމުން ސައީދު ވިދާޅުވީ 100 އަހަރާއި ނުބައްދަލު ދަރަނި ނަގައި، އަޑި ނޭނގޭ ފުންމިނަށް އިޤްތިޞާދު ވައްޓައިލި 5 އަހަރުގެ މިނިސްޓަރު އެފަދަ ވާހަކަތައް ދެއްކުން ލަދުވެތި ކަމަށެވެ.
"މުޅި ނިޒާމް އެފުށް މިފުށަށް ޖަހައި، ގައުމުގެ މާލިއްޔަތު އަނދަވަޅަކަށް ވައްޓައިލީ އެމްޑީޕީން. ވަކި މީހަކަށްވުރެ ޤައުމުގެ މަސްލަޙަތު މާ މުހިއްމު،" ސައީދު ވިދާޅުވި އެވެ.
ބީއެމްއެލްގެ ބޯޑު މެމްބަރު ކަމުން އެ ބޭންކުގެ ޑެޕިއުޓީ ސީއީއޯ އައިޝަތު ނޫރައްދީން ވަކިކުރުމާ ގުޅިގެން ފައްޔާޒު "އެކްސް"ގައި ކުރެއްވި ޕޯސްޓެއްގައި ވިދާޅުވީ އިގުތިސޯދީ ކާރިސާއެއްގެ ތުންފަތްމަތީގައި ގައުމު އޮތް ވަގުތެއްގައި އައިޝަތު ނޫރައްދީން ފަދަ ތަޖުރިބާކާރު ބޭންކަރަކު ބީއެމްއެލްގެ ބޯޑުން ވަކިކުރުމަކީ މޮޔަ ކަމެއް ކަމަށެވެ.
އަދި މިކަމުގެ ސަބަބުން ބައިނަލްއަގުވާމީ މުޖުތަމައުގެ މެދުގައި ރާއްޖޭގެ މާލީ ނިޒާމާ މެދު ނޭދެވޭ ވިސްނުމެއް އުފެދިގެންދާނެ ކަމަށް ފައްޔާޒު ވިދާޅުވި އެވެ.