އިގުތިސާދު ހަމައަކަށް އެޅުވުމުގެ ގާބިލުކަމެއް ސަރުކާރުގައި ނެތް ކަމަށް އެމްޑީޕީގެ ޗެއާޕާސަން ފައްޔާޒު އިސްމާއިލް ވިދާޅުވެއްޖެ އެވެ.
ފައްޔާޒު މިހެން ވިދާޅުވީ ރާއްޖޭގެ މާލިއްޔަތު އަނދަވަޅަކަށް ވައްޓައިލީ އެމްޑީޕީން ކަމަށް އިކޮނޮމިކް މިނިސްޓަރު މުހައްމަދު ސައީދު ވިދާޅުވުމާ ގުޅިގެންނެވެ.
ސައީދަށް ރައްދު ދެއްވަމުން ކުރީގެ އިކޮނޮމިކް މިނިސްޓަރު ފައްޔާޒު "އެކްސް"ގައި ކުރެއްވި ޕޯސްޓެއްގައި ވިދާޅުވީ ރާއްޖޭގެ އިގުތިސާދު އަމާން ބަނދަރަކަށް ގެންދިޔުމުގެ ގާބިލުކަމެއް އަދި ތަސައްވުރެއް ވެސް މިނިސްޓަރު ސައީދާއި ސަރުކާރުގެ ފަރާތުން ފެނިގެން ނުދާ ކަމަށެވެ.
ރައްޔިތުން ވެރިކަން ހަވާލުކުރީ އެމްޑީޕީން ބޮއްސުންކޮށްލި އިގްތިސާދު ހަމައަކަށް އަޅުވާނެ ކަމަށް ކެމްޕޭނުގައި ވީ ވައުދުތަކުގެ މައްޗަށް ކަމަށާއި ނަމަވެސް ވެރިކަމަށް 9 މަސް ފާއިތުވެގެންދާއިރާއި ފަސް އަހަރު ނިމޭއިރު ވެސް ކުރީ ސަރުކާރު ކުށްވެރި ކުރުމުގައި ސަރުކާރު ދެމި އޮންނާނެ ކަމަށް ރައްޔިތުން އުއްމީދު ނުކުރާ ކަމަށް ފައްޔާޒު ވިދާޅުވި އެވެ. އޭގެ ބަދަލުގައި ރައްޔިތުން ބޭނުންވަނީ ހައްލުތައް ކަމަށްވެސް ވިދާޅުވި އެވެ.
ފައްޔާޒު ވިދާޅުވީ ސަރުކާރުން ކުރިއަށް އޮތް ތަނުގައި ފޮރިން ރިޒާވް ވަރުގަދަކުރުމުގެ ނަމުގައި ސޮވެރިން ޑިވެލޮޕްމެންޓު ފަންޑުގައި ވެސް އަތްލާނެ ކަމަށާއި އަދި ފައިސާ ޗާޕު ކުރުމަކީ ވެސް އެކަށީގެންވާ ކަމެއް ކަމަށެވެ. މިއީ ކުދި އަދި ވަގުތީ ހައްލުތައް ކަމަށާއި މިފަދަ ކަންކަން ކޮށްގެން ނަމަވެސް ކުދި އަދި މެދު ފަންތީގެ ވިޔަފާރިތައް ސަލާމަތްކޮށް މުޅި ގައުމުގެ އިގުތިސާދު ސަލާމަތް ކޮށްދެއްވުމަށް ފައްޔާޒު ވަނީ ސަރުކާރަށް ގޮވާލާފަ އެވެ.