ސްޕެނިޝް ލީގުގައި ރޭ އެތްލެޓިކް ބިލްބާއޯގެ މައްޗަށް 2-1 އިން ބާސެލޯނާ ކުރި ހޯދައިފި އެވެ.
ބާސާ އިން ރަނގަޅު ކުޅުމެއް ދެއްކި މި މެޗުގެ 24 ވަނަ މިނެޓްގައި ލަމީން ޔަމާލް ވަނީ އެޓީމަށް ލީޑު ނަގައިދީފަ އެވެ. އުމުރުން 17 އަހަރުގެ ޔަމާލް މި ގޯލު ކާމިޔާބު ކުރީ ބިލްބާއޯގެ އޭރިއާގެ ބޭރުގައި ހުރެ ފޮނުވާލި ހަމަލާއަކުންނެވެ.
ފުރަތަމަ ހާފް ނިމުމުގެ ކުރިން ލިބުނު ޕެނަލްޓީއަކުން އޮއިހާން ސަންސެޓް ވަނީ ބިލްބާއޯ އަށް ނަތީޖާ އެއްވަރުކޮށްދީފަ އެވެ. މިއީ ބިލްބާއޯގެ އެލެކްސް ބެރެންގުއާ އަށް ބާސާގެ ޒުވާން ޑިފެންޑަރު ޕައު ކުބާސީ ކުރި ފައުލަކާ ގުޅިގެން ލިބުނު ޕެނަލްޓީއެކެވެ.
ދެވަނަ ހާފުގައި ބާސާ އިން ވަރަށް ބޮޑަށް ކުރިއަށް ޖެހިލައިގެން ދިޔައީ ބިލްބާއޯގެ ގޯލަށް ނުރައްކާ ކުރަމުންނެވެ. އެގޮތުން މި މެޗުން މޮޅުވި ގޯލު ބާސާ އަށް މެޗުގެ 75 ވަނަ މިނެޓްގައި ކާމިޔާބުކޮށްދިނީ އެޓީމުގެ ފޯވާޑް ރޮބަޓް ލެވެންޑޯސްކީ އެވެ. މިއީ ބިލްބާއޯގެ އޭރިއާގެ ތެރެއަށް ޕެޑްރީ ހުރަސްކޮށްލި ބޯޅައަކުން ލެވެންޑޯސްކީ ކާމިޔާބު ކުރި ގޯލެކެވެ.
ލީގުގައި ކުޅުނު ފުރަތަމަ މެޗުން ވެސް ބާސާ މޮޅުވިއިރު، އެ މެޗުގައި އެޓީމުން ވެލެންސިއާ ބަލިކުރީ 2-1 އިންނެވެ.