މި އަހަރުގެ މަސްވެރިންގެ ދުވަސް ބ. ތުޅާދޫގައި ފާހަގަކުރާ ގޮތަށް ނިންމައިފި އެވެ.
އެ ދުވަސް ފާހަގަކުރުމަށް ވާން ޖެހޭ ތައްޔާރީތަކާ ގުޅޭ ގޮތުން ފިޝަރީޒް މިނިސްޓްރީގެ ޓީމެއް ވެސް މިހާރު އަންނަނީ ތުޅާދޫގައި ހަރަކާތްތެރިވަމުންނެވެ. އެ ޓީމުގައި އިސްކޮށް ހުންނެވީ ސްޓޭޓް މިނިސްޓަރު މުޙައްމަދު މުއްޠަލިބެވެ.
މިނިސްޓްރީގެ ޓީމުން ތުޅާދު އަށް ކުރާ ދަތުރުގައި އެ ރަށު ކައުންސިލާއި، ސްކޫލާއި އަދި ސިއްޙީ މަރުކަޒާއެކު ރަސްމީ ބައްދަލުވުންތަކެއް ބާއްވާފައިވެ އެވެ.
މި ބައްދަލުވުންތަކުގެ މައިގަނޑު މަގުސަދަކީ މަސްވެރިންގެ ދުވަހާ ގުޅިގެން ކުރިއަށް ގެންދާ ރަސްމީ އިންތިޒާމްތައް ހަމަޖެއްސުމާ ގުޅޭ ގޮތުން މަޝްވަރާކުރުމެވެ. މީގެ އިތުރުން، މަސްވެރިކަމުގައި ހަރަކާތްތެރިވާ އެކި ފަރާތްތަކާއި މަސްވެރިންނާ ވެސް ބައްދަލުކުރަން ވެސް ހަމަޖެހިފައެވެ.
ރާއްޖޭގައި މަސްވެރިންގެ ދުވަހުގެ ގޮތުގައި ފާހަގަ ކުރަނީ ކޮންމެ އަހަރެއްގެ ވެސް ޑިސެމްބަރު 10 އެވެ. އެ ދުވަސް ފާހަގަކުރަން ފެށީ 1989 އިން ފެށިގެންނެވެ.
މިދިޔަ އަހަރު މަސްވެރިންގެ ދުވަސް ފާހަގަކުރީ މާލޭގަ އެވެ.