މިހާރު ރާއްޖޭގެ އިގުތިސާދީ އޮތް ނާޒުކު ހާލަތު ބަދަލު ކުރަން ސަރުކާރުގެ ބޮޑާކަން ދޫކޮށް، އެންމެން އެކީގައި މަސައްކަތް ކުރަން ޖެހޭ ކަމަށް އައްޑޫ މޭޔަރު އަލީ ނިޒާރު ވިދާޅުވެއްޖެ އެވެ.
ސޯޝަލް މީޑިއާ ޕޯސްޓެއްގައި އޭނަ ވިދާޅުވީ ގައުމުގެ އިގުތިސާދީ ހާލަތަކީ ރައްޔިތުންނަށް ސިއްރުވާން ޖެހޭނެ މައުލޫމާތެއް ނޫން ކަމަށެވެ.
"އިވޭ އަޑާއި ވަމުންދާ ގޮތަށް ބަލާ އިރު ގައުމު މި އޮތީ އިގްތިސާދީ ގޮތުން ނާޒުކު ހިސާބެއްގައި ކަމަށް ގަބޫލު ކުރެވޭ،" މޭޔަރު ވިދާޅުވި އެވެ. "މި ދަނޑިވަޅުގައި އާރާއި ބާރުގެ ބޮޑާކަން ދޫކޮށް ހަމަބިމަށް ތިރިވެ އެންމެން ގުޅިގެން އިތުރަށް ނިކަމެތިވެ ނުދާނެ ގޮތެއް ހޯދަން މަސައްކަތް ފަށަން ޖެހޭ."
ގައުމުގެ އިގްތިސާދީ ހާލަތަކީ ރައްޔިތުންނަށް ސިއްރުވާންޖެހޭނެ މައުލޫމާތެއްނޫން. އިވޭ އަޑާއި ވަމުންދާ ގޮތަށް ބަލާއިރު ގައުމު މި އޮތީ އިގްތިސާދީ ގޮތުން ނާޒުކު ހިސާބެއްގައި ކަމަށް ގަބޫލު ކުރެވޭ. މިދަޑިވަޅުގައި އާރާއި ބާރުގެ ބޮޑާކަން ދޫކޮށް ހަމަބިމަށް ތިރިވެ އެންމެން ގުޅިގެން…
— Ali Nizar (@DhekunuNizar) August 24, 2024
އޭނަ ވިދާޅުވީ ދާދި ފަހުން އަވައްޓެރި ސްރީ ލަންކާ އަށް ވެސް އިގުސާދީ ބޮޑެތި މައްސަލަތައް ދިމާވި ވެރިން ކިބުރުވެރިކަމާއި ބޮޑާކަން އިސްކުރުމާއި ބަސްނޭހުމުގެ ސަބަބުން ކަމަށެވެ.
ރާއްޖޭގެ އިގުތިސާދީ ހާލަތު ރަނގަޅު ކުރަން ފިޔަވަޅުތަކެއް އަޅަމުން އަންނަ ކަމަށް ސަރުކާރުން އަންނަނީ ބުނަމުންނެވެ. ނަމަވެސް އިދިކޮޅު ފަރާތްތަކުން ބުނާ ގޮތުގައި ސަރުކާރުން އުޅެނީ ރާއްޖޭގެ މިހާރުގެ ހަގީގީ އިގުތިސާދު ފޮރުވާށެވެ.