ނައިބު ރައީސް ހުސައިން މުހައްމަދު ލަތީފް ސޯޝަލްމީޑިއާގައި އިއްޔެ ހިއްސާ ކުރެއްވި ޕޯސްޓަކީ ކުރީގެ ވެރިންނަށް އަމާޒު ކުރެއްވި މެސެޖެއް ކަމަށް އެމަނިކުފާނު ވިދާޅުވެއްޖެއެވެ.
ނައިބު ރައީސް މިފަދައިން ވިދާޅުވެފައިވަނީ އެމަނިކުފާނު އިއްޔެ ކުރެއްވި ޕޯސްޓަކާއި ގުޅިގެން އެކި ގޮތްގޮތަށް ސޯޝަލްމީޑިއާގައި ވާހަކަ ދެކެވެމުންދަނިކޮށެވެ.
ނައިބު ރައީސް އިއްޔެ އެކްސްގައި ކުރެއްވި ޕޯސްޓެއްގައި ވިދާޅުވެފައިވަނީ، ކޮންމެ ކަމަކީވެސް ވަގުތު ކަނޑައެޅިގެންވާ ކަމެއް ކަމަށާއި އެ ލިބުނު ވަގުތަށް އިހުތިރާމުކޮށް ޝުކުރުވެރި ވުމުން ލިބޭ ޤަދަރާއި، އުފާވެރިކަން މާ ރަނގަޅުކަމަށެވެ. އަދި ވިދާޅުވީ އެއްވެސް ކަމަކީ ދާއިމަށް ތިމާގެ ހައްޤެއް ކަމަށް ނުދެކުމަށެވެ.
މި ޕޯސްޓާއި ގުޅިގެން އެކި ގޮތްގޮތަށް ސޯޝަލްމީޑިއާގައި ވާހަކަ ދެކެވިފައިވާއިރު މިއަދު ނައިބު ރައީސް ހުސައިން މުހައްމަދު ލަތީފް ވިދާޅުވީ، އެ މެސެޖަކީ ކުރީގެ ވެރިކަން ކުރައްވާފައިވާ ބޭފުޅުންނާއި ދައުލަތުގެ އިސް މަގާމުތައް ފުރުއްވާފައިވާ ބޭފުޅުންނަށް ރައްދުކޮށް ދިން މެސެޖެއް ކަމަށެވެ.
ދައުލަތުގެ ވެރިންނާއި އިސް މަގާމުތައް ފުރުއްވާފައިވާ ބޭފުޅުންނަކީ ރައްޔިތުން ނިންމާފައިވާ ވަކި މުއްދަތަކަށް މަސްއޫލިއްޔަތު އަދާކުރައްވަން ޖެހޭ ބޭފުޅުންކަން ފާހަގަކޮށް ނައިބު ރައީސް ވިދާޅުވީ އެ މުއްދަތު ހަމަވުމުން އެކަމަށް އިޚްތިރާމު ނުކުރުމަކީ ރައްޔިތުންގެ ނިންމުމަށް އިޚްތިރާމު ކުޑަކޮށް އެނިންމުމަށް ގޮންޖެހުން ކަމަށެވެ.
ނައިބު ރައީސް ވަނީ އެފަދަ ބޭފުޅުން ކުރިއަށް އޮތް ތަނުގައި ޒިންމާދާރުކަމާއެކު ސަރުކާރު ޖަވާބުދާރީކޮށް، ރައްޔިތުންގެ ލޯތްބާއި އިޚްތިރާމު ލިބޭ ގޮތަށް މަސައްކަތް ކުރިއަށް ގެންދަވާނެ ކަމަށް އުންމީދުކުރައްވާކަމަށް ވިދާޅުވެފައެވެ.