ބޭންކް އޮފް މޯލްޑިވްސް (ބީއެމްއެލް) އިން ޑޮލަރު މުއާމަލާތްތަކަށް މިއަދު ގެނައި ބަދަލު މުރާޖާ ކުރުމަށް ނިންމައިފިއެވެ.
އިތުބާރުހުރި މަސްދަރަކުން "އައްޑޫލައިވް"އަށް މައުލޫމާތު ދީފައިވާ ގޮތުގައި ބީއެމްއެލްގެ ނިންމުން މުރާޖާ ކުރުމަށް ބޯޑު ބައްދަލުވުމެއް މިއަދު މެންދުރު 01:30 ގައި ބޭއްވުމަށް ވަނީ ނިންމާފައެވެ.
މައުލޫމާތު ލިބިފައިވާ ގޮތުގައި ބީއެމްއެލް ބޯޑުގެ މި ބައްދަލުވުމުގައި މިއަދު ނިންމި ނިންމުން ބަދަލުކުރާނެއެވެ.
ބީއެމްއެލްއިން މިއަދު އާންމުކުރި ބަޔާނެއްގައި ބުނީ ޑެބިޓް ކާޑްތަކުގެ ޕްރައިމަރީ އެކައުންޓަކީ ރުފިޔާ އެކައުންޓެއް ނަމަ ބޭރު ފައިސާގެ މުއާމަލާތްތަކަށް އެއްވެސް އަދަދެއް ނުލިބޭނެ ކަމަށެވެ. އަދި މިއަދުން ފެށިގެން ދޫކުރާ ޑެބިޓް އަދި ކްރެޑިޓް ކާޑުގެ ޕްރައިމަރީ އެކައުންޓަކީ ރުފިޔާ އެކައުންޓެއް ނަމަ ބޭރު ފައިސާގެ މުއާމަލާތްތަކަށް ވެސް އެއްވެސް އަދަދެއް ނުލިބޭނެ ކަމަށް ބުންޏެވެ.
މީގެ އިތުރުން މިހާރު ދޫކޮށްފައިވާ ސްޓޭންޑާޑް އަދި ގޯލްޑް ކްރެޑިޓް ކާޑުތަކުން މަހެއްގެ މައްޗަށް ރާއްޖެ އިން ބޭރުން ކުރެވޭ މުއާމަލާތް 100 ޑޮލަރަށް ދަށްކޮށްފައިވާ ކަމަށް ވެސް ބިއެމްއެމް އިން ބުންޏެވެ.