ޤާނޫނުގައި ބުނާ މިންވަރަށް މެންބަރުންގެ އަދަދު ހަމަނުވާތީ މޯލްޑިވްސް ރިފޯމް މޫވްމަންޓް (އެމްއާރުއެމް) އުވާލުމަށް އިލެކްޝަންސް ކޮމިޝަނުން އަނެއްކާވެސް ނިންމައިފިއެވެ.
އިލެކްޝަންސް ކޮމިޝަންގެ މެންބަރު ހަސަން ޒަކަރިއްޔާ "އައްޑޫލައިވް" އަށް މައުލޫމާތު ދެއްވަމުން ވިދާޅުވީ ސިޔާސީ ޕާޓީތަކުގެ ޤާނޫނުގައި ބުނާ 3000 މެންބަރުން އެމްއާރްއެމްގައި ހަމަނުވާތީ އެއަދަދު ހަމަކުރުމަށް ނޯޓިސް ދެވުނު ކަމަށެވެ. އެހެންނަމަވެސް އެ އަަދަދު ހަމަވެފައި ނުވާ ކަމަށް ވިދާޅުވިއެވެ.
އެހެންކަމުން އިލެކްޝަންސް ކޮމިޝަނުން މިދިޔަ ހަފުތާގައި ބޭއްވި ބައްދަލުވުމެއްގައި އެޕާޓީ އުވާލުމަށް ނިންމާފައިވާ ކަމަށް ޒަކަރިއްޔާ ވިދާޅުވިއެވެ. އަދި އެކަމާ ގުޅިގެން ކުރަންޖެހޭ އިދާރީ ކަންކަން ކުރެވެމުންދާ ކަމަށް ވިދާޅުވިއެވެ.
އެމްއާރްއެމްގައި މިވަގަތު ތިބީ 2235 މެންބަރުންނެވެ. އަދި އެމްއާރްއެމް އުވާލުމަށް ނިންމިކަން އީސީން ވަނީ އެޕާޓީއަށް މިއަދު އަންގާފައެވެ. އީސީން އެމްއާރްއެމްއަށް އަންގާފައިވަނީ މިއަދުން ފެށިގެން 30 ދުވަހުގެ ތެރޭގައި ޕާޓީގެ މުދަލާއި ދަރަންޏާއި މެދު ސިޔާސީ ޕާޓީތަކުގެ ޤާނޫނުގައި ވާގޮތުގެ މަތިން އަމަލު ކުރުމަށްފަހު އެކަން ލަސްވެގެން 15 ދުވަހުގެ ތެރޭގައި އެ ކޮމިޝަނަށް އެންގުމަށެވެ.
މިދިޔަ އަހަރުގެ މޭ މަހުގެ ތެރޭގައިވެސް އިލެކްޝަންސް ކޮމިޝަނުން ވަނީ އެމްއާރްއެމް އުވާލުމަށް ނިންމާފައެވެ. އެހެންނަމަވެސް އީސީން އެ ނިންމުން ނިންމާފައިވަނީ ގާނޫނާ ހިލާފަށް ކަމަށް ސިވިލް ކޯޓުން ވަނީ މިއަހަރު ފެބްރުއަރީގައި ނިންމާފައެވެ.