ރާއްޖެ ބަނގުރޫޓު ނުވެގެން ބަޔަކު އުޅޭ ކަމަށް އިކޮނޮމިކް މިނިސްޓަރު މުހައްމަދު ސައީދު ވިދާޅުވެއްޖެ އެވެ.
ރައީސް އޮފީހުގައި މިއަދު ބޭއްވި ނޫސްވެރިންގެ ބައްދަލުވުމުގައި ވާހަކަދައްކަމުން ސައީދު ވިދާޅުވީ ބައެއް ސިޔާސީ ފަރާތްތަކުގެ ވާހަކަތައް ހުރީ ރާއްޖެ ބަނގުރޫޓު ނުވެގެން އަދި ތިން ހަފްތާތެރޭ ރާއްޖެ ބަނގުރޫޓުކޮށްލަން އުޅޭ ކަހަލަ ގޮތަކަށް ކަމަށާއި މި ވާހަކަތައް އެ ފަރާތްތަކުން ދައްކަނީ ވެސް ވަރަށް އުފަލާއެކު ކަމަށެވެ.
"ފޮރިން އިންވެސްޓަރުންނަށް ޝޮކު ޖެހޭ ވާހަކައާ، ބަނގުރޫޓު ނުވެގެން އުޅޭ ވާހަކައާ، ހުރިހާ ވާހަކައެއް ވެސް އެބަ ދައްކާ އުފަލާ އެއްކޮށް،" ސައީދު ވިދާޅުވި އެވެ.
ސައީދު ވިދާޅުވީ ކުރީ ސަރުކާރުން ރާއްޖެ 100 އަހަރަށް ނުދަރާ ވަރަށް އޮތީ ދަރުވާލާފައި ކަމަށާއި އަދި ޑޮލަރު ރިޒާވް ވެސް އެއްކޮށް އޮތީ ހުސްކޮށްލާފައި ކަމަށެވެ. ނަމަވެސް މިއަދު ކުރީ ސަރުކާރުގެ ބޭފުޅުން ނޫސްވެރިންގެ ބައްދަލުވުންތަކަށް އަރާ ދައްކަވާ ވާހަކަތަކުން ހީވަނީ "އަލަށް އުފަންވި ކުދިންހެން" ކަމަށް ސައީދު ވިދާޅުވި އެވެ.
ރާއްޖެ އަށް ދިމާވެފައިވާ މާލީ ހާލަތުން އަރައިގަތުމަށް އެތައް މަސައްކަތްތަކެއް ސަރުކާރުން ކުރަމުންދާ ކަމަށާއި ކުރިއަށް އޮތް ދުވަސްތަކުގެ ތެރޭގައި ރާއްޖޭގައި މަސައްކަތްތަކެއް ކުރަމުންދާތަން ފެންނާނެ ކަމަށް ސައީދު ވިދާޅުވި އެވެ. އަދި މި ހާލަތު ބަދަލުކުރެވޭތަން ވެސް ފެންނަ ކަމަށާއި ސަރުކާރުގެ މަސައްކަތްތައް ކުރިއަށް ގެންދާނީ ޒިންމާދާރު ގޮތަކަށް ކަމަށްވެސް އޭނާ ވިދާޅުވި އެވެ.