ކުރިއަށް އޮތީ ބަނޑުހައިހޫނުކަމުގެ ދުވަސްތަކެއް ކަމަށް އެމްޑީޕީގެ ޗެއާޕާސަން ފައްޔާޒު އިސްމާއިލް ވިދާޅުވެއްޖެ އެވެ.
އެމްޑީޕީން ރޭ ބޭއްވި ގައުމީ މަޖިލީހުގެ ކުއްލި ޖަލްސާގައި ވާހަކަދައްކަމުން ފައްޔާޒު ވިދާޅުވީ ގައުމު މިއަދު މިއޮތް ހާލަތުގެ އެންމެ ފުރިހަމަ ޒިންމާ ނަގަންޖެހޭ އެއް ބަޔަކީ އަމިއްލަ އެދުމަށް "އިބޫ ނޫން ގޮތެއް" ރައްޔިތުންނަށް ހޯދައިދިން ފަރާތްތަކުން ކަމަށާއި މިއަދު ރައްޔިތުން ތަހައްމަލު ކުރަމުންދަނީ އެކަމުގެ ހިތާމައިގެ ފެށުން ކަމަށެވެ.
"ކުރިއަށް އޮތީ ބަނަ ދުވަސްތަކެއް. ކުރިއަށް އޮތީ އަޅުގަނޑުމެންނަށް ބަނޑުހައިހޫނުކަމުގެ ދުވަސްތަކެއް. އެއްޗެހީގެ އަގުތައް އަރައިގެން އެދަނީ އާންމު ރައްޔިތުންނަށް އަތް ނުފޯރާ ހިސާބަށް. މުސާރައެއް ނުދެވޭ ހިސާބަށް މިދަނީ. އާންމު ޕްރައިވެޓް ސެކްޓަރުގެ ވިޔަފާރިތައް ފުނޑުފުނޑު ވެގެން މިދަނީ،" ކުރީގެ އިކޮނޮމިކް މިނިސްޓަރު ވިދާޅުވި އެވެ.
ފައްޔާޒު ވިދާޅުވީ އެމްޑީޕީން އެކިއެކި ޕްލެޓްފޯމުތަކުގައި ކަންކަން ގޯސް ކަމުގެ ވާހަކަ ދައްކަމުންދާ ކަމަށާއި އިގްތިސާދު އަނދަވަޅަކަށް ވެއްޓޭތަން ސަރުކާރަށް ކެނޑިނޭޅި ފާހަގަކޮށްދެމުންދާ ކަމަށެވެ. އެމްޑީޕީން މިހާތަނަށް މަޑުން ތިބީ ޖަލަށްދާން ޖެހިދާނެތީ ބިރުން ނޫން ކަމަށާއި އެމްޑީޕީން ފަހަތަށް ޖެހިލައިގެން ތިބީ ރައްޔިތުން އާއެނކޭ ބުނި މީހުންނަށް ފުރުސަތު ދިނުމަށް ކަމަށްވާއިރު، ދިވެހިންގެ ސަލާމަތަށްޓަކާ މިހާރު ތިބިހެން ތިބެވެން ނެތް ކަމަށްވެސް ފައްޔާޒު ވިދާޅުވި އެވެ.
"އަޅުގަނޑުމެން ބަލާނަން. މަސައްކަތް ކުރާނަން. ލަންކާގަ ވީގޮތަށް ވިޔަނުދީ ރައްޔިތުން ބަނޑުހައިހޫނު ކަންމަތީ ނިކުމެ ސަރުކާރު ވައްޓާލާ ސަރުކާރުގެ ވެރިންނަށް އަނިޔާކުރާތަން، ވިޔަ ނުދިނުމަށްޓަކައި އަޅުގަނޑުމެން މަގުމައްޗަށް ނުކުންނަށް ޖެހުނު ކަމުގައި ވަންޏާމު އަޅުގަނޑުމެން އަޑު އުފުލުމަށް އަޅުގަނޑުމެން މަގުމައްޗަށްވެސް ނުކުންނާނަން،" އޭނާ ވިދާޅުވި އެވެ.