މާދަމާ ރޭ އޮލިމްޕަހުގައި ޕްރީމިއަކުރަން ހަމަޖެހިފައިވާ ފިލްމު "ކަމަނާ" އަކީ ގެވެށިއަނިޔާގެ ޝިކާރަކައަކަށްވާ އަންހެނުންނަށް ދެވޭ ހިތްވަރަކަށް ވާނެ ކަމަށް ފިލްމުގެ ޕްރޮޑިއުސަރު އަލީ ޝާނީޒް ބުނެފި އެވެ.
ބޭވަފާތެރި ފިރިއެއްގެ ސަބަބުން މާބަނޑު މީހަކަށް ކުރިމަތިލާން ޖެހޭ ގެވެށިއަނިޔާގެ ހަގީގީ ހާދިސާތަކެއްގެ މައްޗަށް ބިނާކޮށް ހަދާފައިވާ މި ފިލްމާ ބެހޭ ގޮތުން ޕްރޮޑިއުސަރު ބުނީ "ކަމަނާ" އަކީ ހަމައެކަނި ފިލްމެއް ނޫން ކަމަށާއި މިއީ ގެވެށިއަނިޔާގެ ޝިކާރައަކަށްވެފައިވާ ކަނބަލުންނަށް ދެވޭ ހިތްވަރަކަށް ވާނެ ކަމަށެވެ.
"މި ފިލްމަކީ ޖުމްލަކޮށް މުޅި މުޖުތަމަޢުއަށް ދެވޭ އިންޒާރުގެ ވޭކަޕް ކޯލެއް." މިދިޔަ އަހަރު "ލޯބިވެވިއްޖެ" ގެނެސްދިން ޕްރޮޑިއުސަރު ބުންޏެވެ.
ޝާނީޒް ބުނީ "ކަމަނާ" އަކީ ގެވެށިއަނިޔާ އާއި ވަކި ޖިންސަކަށްވީތީ ލިބޭ އަނިޔާއާ ދެކޮޅަށް ތެދުވުމަށް މުޅި މުޖުތަމަޢު އަށް ދެވޭ ވަރަށް ރަނގަޅު މެސެޖަކަށް ވާނެ ކަމަށެވެ. އަދި މިއީ ދިވެހި މުޖުތަމައުގައި އޮތް އެންމެ ބޮޑެތި އިޖުތިމާޢީ މައްސަލަތަކުގެ ތެރޭގައި ހިމެނޭ ގެވެށިއަނިޔާ އަށް މުޖުތަމަޢު ހޭލުންތެރިކުރުވުމުގެ މަގުސަދުގައި އުފައްދާފައިވާ ފިލްމެކެވެ.
މި އަހަރުގެ އެންމެ އުންމީދީ ފިލްމުތަކުގެ ތެރޭގައި ހިމެނޭ މި ފިލްމަކީ މަހުދީ އަހުމަދުގެ ސްކްރީންޕްލޭއަކަށް ހުސައިން މުނައްވަރު (ކިޑް) ޑައިރެކްޓްކޮށްފައިވާ ފިލްމެކެވެ. "ކަމަނާ" ގެ ލީޑް ތަރިންނަކީ މަރިޔަމް އައްޒަ އާއި ޔޫސުޗް ޝަފީއު (ޔޫއްޕެ) ގެ އިތުރުން އައިމިނަތު ރަޝްފާ (އާޝާ) އެވެ.
ހއ. މޮޅަދޫގައި ޝޫޓްކޮށްފައިވާ "ކަމަނާ" އަކީ ޝާނީޒްގެ ސެޓާން ސްޓޫޑިއޯ އާއި ކިޑް ޕްރޮޑަކްޝަން ގުޅިގެން ގެނެސްދޭ ފިލްމެކެވެ.
މި ފިލްމު މާދަމާ ރޭ ޕްރީމިއާކުރަން ތައްޔާރުވަމުން އަންނަ ފިލްމަށް ވަރަށް ބޮޑު ތަރުހީބެއް ލިބެމުން އަންނާތީ ކޮންމެ ހަފުތާ ބަންދެއްގައި ދަންވަރު ޝޯތަކެއް ދެއްކުުމަށް ވެސް ވަނީ ނިންމައިފަ އެވެ. އެއީ ރޭގަނޑު 8:30 ގައި ބާއްވާ ޝޯގެ އިތުރުން 11:30 ގައި ބާއްވާ ޝޯ އެވެ.
"ކަމަނާ" ގިނަ ވަރަށް ރަށްރަށުގައި ވެސް އަޅުވަން ހަމަޖެހިފައިވެ އެވެ.
މި ފިލްމަކީ މި އަހަރު އޮލިމްޕަހުގައި އަޅުވާ 7 ވަނަ ފިލްމެވެ.