މަޖީދިއްޔާ ސްކޫލްގައި ސްމާޓް ކްލާސްތަކެއް ހަދަން ނިންމާފައިވާ ކަމަށް ރައީސް ޑރ. މުހައްމަދު މުއިއްޒު ވިދާޅުވެއްޖެ އެވެ.
އެ ސްކޫލަށް 75 އަހަރު ފުރުމާ ގުޅިގެން އެކަމާ ގުޅުވައި ހެދި "ސައްތަވީ ބިނާ" އިފުތިތާހު ކުރަން ރޭ ބޭއްވި ރަސްމިއްޔާތުގައި ރައީސް ވިދާޅުވީ އަންނަ އަހަރު މަޖީދިއްޔާގައި އިތުރު 40 ކްލާސް ރޫމްގެ އިމާރާތެއް ކުރިން ދަރުމަވަންތަ ސްކޫލް ހުރިތަނުގައި އެޅުމަށް ހަމަޖެހިފައިވާ ކަމަށާއި އޭގެ ތެރެއިން ބައެއް ކްލާސްތައް ވާނީ ރާއްޖޭގައި ފުރަތަމަ ފަހަރަށް ޤާއިމުކުރާ ސްމާޓް ކުލާސްތަކަށް ކަމަށެވެ.
ރައީސް ވިދާޅުވީ އެ ކްލާސް ރޫމް އިމާރާތް އަޅާނީ މަޖީދިއްޔާ ކައިރީގައި ހުންނަ ކުރީގެ ދަރުމަވަންތަ ސްކޫލް ހުރި ތަނުގަ އެވެ.
އެ މަނިކުފާނު ވިދާޅުވީ މަޖީދިއްޔާ ސްކޫލުގެ އިސްދަރިވަރުންގެ ފަޚުރެއް ކަމަށްވާ ދާރުލް އުލޫމާ ކުރިބޯށި އިމާރާތް ނެޝަނަލް އެޑިއުކޭޝަން މިއުޒިއަމެއްގެ ގޮތުގައި ވެސް ތަރައްގީ ކުރުމަށް ނިންމާފައިވާ ކަމަށެވެ. އަދި އެކަމުގެ ސަބަބުން ކުރިއަށް އޮތް ޖީލުތަކަށް ރާއްޖޭގޭ ތާރީހީ ތަޢުލީމީ ހަޔާތުގެ މަޢުލޫމާތު ފޯރުކޮށް ދެވޭނެ ކަމަށް ރައީސް ވިދާޅުވި އެވެ.