އޮކްޓޯބަރުގައި އޮލިމްޕަހަށް ގެންނަން ނިންމާފައިވާ ހޮރޯ-ކޮމެޑީ "ބިބީ" ގެ ދައްކައިލުމަކުން ބެލުންތެރިން މިއަދު ސިއްސުވާލައިފި އެވެ.
މިއި ހޮރޯ-ކޮމެޑީ އަކީ ބެލުންތެރިން ބިރުގަންނުވާލައި، ހެއްވައިލާނެ ފިލްމެކެވެ. އޮކްޓޯބަރު 7 ގައި އޮލިމްޕަށް ދޫކޮށްލަން ނިންމާފައިވާ ބިބީ" އަކީ މުޅިން އާ އަންހެން ޑައިރެކްޓަރެއް ކަމަށްވާ ޝަހުދާ މަހުމޫދު ލިޔެ، ޑައިރެކްޓްކޮށްފައިވާ ޑާކް އެންޓަޓައިންމަންޓްގެ ފުރަތަމަ ހޮރޯ-ކޮމެޑީ އެވެ.
މީގެ ލީޑް ބަތަލަކީ ޝަހުދާގެ ފިރިމީހާ ޝަރަފު އަބްދުﷲ އެވެ. އަދި ފިލްމުގެ ލީޑް ބަތަލާ އަކީ މަރިޔަމް މަޖުދާ (މަޖޫ) އެވެ. އިތުރު ކާސްޓުންގެ ތެރޭގައި ޝީލާ ނަޖީބާއި އަހުމަދު ސައީދާއި އަބްދުﷲ ޝާފިއު (ފުބޫ) އާއި އަހުމަދު ޝާކިރު ޝާއްކޮ (އައްމަޑޭ) އާއި އާދަމް ރިޒްވީ އަދި މަލީހާ ވަހީދު ފަދަ ފަންނާނުން ހިމެނެ އެވެ.
މީގެ އިތުރުން "ބިބީ" ގެ ވަރަށް ހާއްސަ ފެނިލުމެއްގައި ކުރީގެ މަޝްހޫރު ތަރި، އިސްލާއީމް ވަޖީހު ވެސް ހިމެނެ އެވެ.
މި ފިލްމަކީ ޑާކް ރެއިނުން މި އަހަރު ބެލުންތެރިންނަށް ގެނެސްދޭ ދެވަނަ ފިލްމެވެ. އެ ސްޓޫޑިއޯގެ މި އަހަރުގެ ފުރަތަމަ ފިލްމަކީ މާޗްގައި ގެނެސްދިން ރިވެންޖް، އެކްޝަން ތުރިލާ "ފުރޭތަ" އެވެ.