ލާމަރުކަޒީ ނިޒާމަށް ބަދަލުތަކެއް ގެނައުމާ ގުޅޭ ގޮތުން ގައުމީ ޔުނިވަސިޓީން ތައްޔާރުކުރި ދިރާސާގެ ޑްރާފްޓް އާންމުކޮށްފި އެވެ.
އެ އިއްޔެ އާންމުކުރީ އޭގައި މަސައްކަތްކުރެއްވި ޔުނިވަސިޓީގެ ޓީމްގައި ހިމެނިވަޑައިގެންނަވައި 8 ބޭފުޅުންގެ ޕްރެޒެންޓޭޝަނާ ވެސް އެކީގަ އެވެ.
މި ދިރާސާއަކީ ލާމަރުކަޒީ ޤާނޫނަށް ގެންނަން ޖެހޭ އިޞްލާޙުތަކަކީ ކޮބައިކަން ދެނެގަތުމަށް ޓަކައި ލާމަރުކަޒީ ނިޒާމް ޤާއިމްކުރުމުން ދެކޭ ތަޞައްވަރުތަކާއި ހުރި ގޮންޖެހުންތައް އަދި އަސަރުތައް ދެނެގަތުމަށް ޓަކައި ޔުނިވަސިޓީގެ ފަރާތުން އަތޮޅުތަކަށް ދަތުރުކޮށް އާންމުންގެ ޚިޔާލާއި މަޝްވަރާގެ އަލީގައި ކުރިއަށް ގެންދެވުނު މިނިވަން ދިރާސާއެކެވެ.
ޔުނިވަސިޓީން ބުނީ ރާއްޖޭގެ އެކި އަތޮޅުތަކުން އުތުރު، މެދުރާއްޖެ އަދި ދެކުނު ހިމެނޭ ގޮތަށް މަދުވެގެން 1155 މީހުންނާއި ދިރާސާ ޓީމުން ސުވާލުކޮށްފައިވާ ކަމަށެވެ. އަދި ކޮންމެ ސަރަޙައްދަކުން އާބާދީގެ ނިސްބަތުން ކުދި އަދި މެދު ފަންތީގެ ރަށްތަކަށް ޓީމްތައް ދަތުރުކޮށް ސާރވޭކޮށް ސުވާލުކުރެވިފައިވާ ކަމަށް ވެސް ބުންޏެވެ.
އެގޮތުން ދިރާސާގައި އަލިއަޅުވައިލެވުނު މުހިންމު ބައިތަކުގެ ތެރޭގައި ލާމަރުކަޒީ ޤާނޫނުގައި ހުރި އުނި ކަންކަންކަމާއި، ލާމަރުކަޒީ ނިޒާމުގެ މުހިންމުކަމާއި، ލާމަރުކަޒީ ނިޒާމުގެ ފައިދާތަކާއި، ގޮންޖެހުންތަކާއި، ދާއިރާގައި މިހާރު ކައުންސިލަރުންގެ ޢަދަދަކީ އާބާދީ ސައިޒަށް އެކަށީގެންވާ ޢަދަދެއް ކަމަށް ގަބޫލުކުރާ މިންވަރާއި އަދި އާބާދީގެ ސައިޒަށް ބަލައިގެން ކައުންސިލަރުންގެ ޢަދަދު ހަމަޖައްސަން ޖެހޭ ކަމަށް ޤަބޫލްކުރާ މިންގަނޑާ ގުޅޭ ކަންކަން ހިމެނެ އެވެ.
ދިރާސާގެ ފައިނަލް ރިޕޯޓް އާންމުކުރަން ހަމަޖެހިފައި ވަނީ އަންނަ މަހު އެވެ.
މި ދިރާސާ އަކީ ސިޓީތަކާއި އިދާރީ ދާއިރާތައް ހިންގުމާއި އާންމު މަސައްކަތްތަކާއި ބެހޭ މިނިސްޓްރީން ހަވާލުކޮށްގެން ގައުމީ ޔުނިވަސިޓީން ކުރިއަށް ގެންދިޔަ މަސައްކަތެކެވެ.
މި ދިރާސާ އަށް ބިނާކޮށް ލާމަރުކަޒީ ނިޒާމަށް ހަރުދަނާ އިސްލާހީ ހެޔޮ ބަދަލުތަކެއް ގެންނާނެ ކަމަށް މިނިސްޓަރު އާދަމް ޝަރީފު އުމަރު ވިދާޅުވެފައިވެ އެވެ.