މާލޭގައި ފިހާރައެއްގައި ބަނގުރާ ވިއްކަމުންދިޔަ ބިދޭސީންތަކެއް ހައްޔަރު ކޮށްފިއެވެ.
މި މައްސަލައިގައި ހައްޔަރު ކޮށްފައިވަނީ އުމުރުން 43 އަހަރު އަދި 42 އަހަރުގެ އިންޑިއާއަށް ނިސްބަތްވާ ދެ ފިރިހެނުންނެވެ.
މި މީހުން ހައްޔަރުކޮށް ބަންދާމެދު ގޮތެއް ނިންމުމަށް އިއްޔެ ކްރިމިނަލް ކޯޓަށް ހާޒިރު ކުރުމުން ކޯޓުން ވަނީ އެމީހުންގެ ބަންދަށް 15 ދުވަސް ދީފައެވެ.
ކޯޓު އަމުރުގައި ބުނެފައިވަނީ މއ. ޓޗްމާރޓް ފިހާރައިގައި ބަނގުރާ ވިއްކާކަމަށް ޕޮލިސް ކޮމާންޑް ސެންޓަރުން ދިން މައުލޫމާތަކާއި ގުޅިގެން ވެރިފަރާތުގެ ހުއްދައާއެކު ފިހާރަ ބަލާފާސްކުރުމުގައި ގުދަނުން ގިނަ އަދަދެއްގެ ބަނގުރާ އަދި ފައިސާ ފެނިފައިވާ ކަމަށެވެ. އަދި ވަގު ޑޯލަރުވެސް ފެނިފައިވާ ކަމަށް ބުނެފައިވެއެވެ.
މި މީހުންނަކީ އިމިގްރޭޝަން ގާނޫނާއި ހިލާފަށް އުޅެމުންދިޔަ ބައެއްކަން އަމުރުގައި ފާހަގަ ކޮށްފައިވެއެވެ. މި ދެ މީހުންވެސް ވަނީ މި މައްސަލައަށް އިއުތިރާފު ވެފައެވެ.