ދެން ކައިވެނި ނުކުރާނެކަމުގެ އިޝާރާތެއް ބޮލީވުޑްގެ ތަރި އާމިރު ޚާން ދީފި އެވެ.
ދަންޖެހިގެން މަރުވި އެކްޓަރު ސުޝާންތު ރާޖްޕޫތު ރައްޓެހިވެގެން އުޅުނު ބަތަލު ރިއާ ޗަކްރަބަތީ ގެނެސްދޭން ފެށި ޕޮޑްކާސްޓް ޝޯގައި މެހުމާނެއްގެ ގޮތުގައި ބައިވެރި، އާމިރު ދެއްކި ވާހަކަތަކުގައި ކައިވެންޏާ ބެހޭ ގޮތުން ސުވާލު ކުރުމުން ބުނީ އޭނަ ދެން ކައިވެންޏެއް ކުރުމަކީ އުނދަގޫ ކަމަކަށް ވާނެ ކަމަށެވެ.
"މިހާރު ފަންސާސް ނުވަ އަހަރުވެއްޖެ. އަދި ހީވޭތަ މި އުމުރުގައި ކައިވެންޏެއް ކުރެވިދާނެހެން؟ އަހަންނަކަށް ހިއެއް ނުވޭ ދެން މި އުމުރުގައި ބައިވެރިޔަކު ހޯދުމަކީ ވެސް ފަސޭހަ ކަމަކަށް ވާނެ ހެނެއް." ދެ ކައިވެނިކޮށް ތިން ދަރިން ތިބި އެކްޓަރު ބުންޏެވެ.
އާމިރު ބުނީ ކައިވެނީގެ ގުޅުމަކާ ދޭތެރޭ މިހާރު ނުވެސް ވިސްނާ ކަމަށާއި އެއަށް ވުރެ މުހިއްމު ގުޅުންތަކެއް މިހާރު ހުރި ކަމަށް ގަބޫލުކުރާ ކަމަށެވެ. އެގޮތުން އާއިލާ އާއި ދަރިންނާ އޮންނަ ގުޅުން ވަރުގަދަކޮށް، އެ މީހުންނާ އެކީ ވަގުތު ހޭދަކުރުން މިހާރު މާ މުހިއްމު. މިހާރު އަސްލު ވަރަށް އުފަލުގައި ހިތްހަމަޖެހިގެން މި އުޅެނީ. އަހަރެން މިހާރު ބޭނުން ވަނީ ކުރިއަށް ވުރެ ހުރިހާ ގޮތަކުން ވެސް ރަނގަޅު މީހަކަށް ވާން."
އާމިރުގެ ފުރަތަމަ ކައިވެންޏަށް ދެ ކުދިން ލިބުނު އިރު، އޭނަ އާއި ރީނާ ދައްތާ 1986 ގައި ކުރި ކައިވެނި ރޫޅައިލީ 2002 ގަ އެވެ. އެ ކައިވެންޏަށް ލިބުނު ދެ ދަރިންނަކީ ޖުނައިދު ޚާން، 31، އާއި އިރާ ޚާން، 27، އެވެ. އިރާ މި އަހަރުގެ ކުރީކޮޅު ކައިވެނިކޮށްފައިވާ އިރު، ޖުނައިދު ވަނީ ދާދި ފަހުން ރިލީޒްކުރި ފިލްމު "މަހާރާޖް" އިން އެކްޓިން ދަތުރު ފަށައިފަ އެވެ.
އާމިރާއި ކިރަން ރާއޯގެ ކައިވެނި 2021 ގައި ރޫޅައިލި އިރު، އެ ކައިވެންޏަށް ލިބިފައިވާ ދަރިޔަކީ މިހާރު 13 އަހަރުގެ އާޒާދު ރާއޯ ޚާނެވެ.
ކާމިޔާބު އެތައް ފިލްމެއް ކުޅެފައިވާ އާމިރު ބުނީ އޭނަގެ ދެ ކައިވެނި "ފްލޮޮޕްވިޔަސް" ކުރީގެ އަނބިންނާ ވަރަށް ގާތް ގުޅުމެއް އޮންނަ ކަމަށެވެ. އެހެންވެ އޭނަ އަކީ އެކަނިވެރިއެއް ކަމަށް ގަބޫލު ނުކުރާ ކަމަށް ބުންޏެވެ.
އާމިރާއި ކިރަންގެ ކައިވެނި ރޫޅުމާ އެކީ އާމިރާއި ޒުވާން ބަތަލާ ފާތިމާ ސަނާ ޝައިހް، 32، ކައިވެނި ކުރަން އުޅޭކަމުގެ އަޑުތަކެއް ވަރަށް ގަދައަށް އެރި އެވެ. ފާތިމާ އަކީ އާމިރުގެ 2016 ގެ "ޑަންގަލް" ގައި އޭނަގެ ދަރިއެެއްގެ ރޯލު ކުޅުނު ބަތަލާއެކެވެ. އަދި އޭގެ ފަހުން 2018 ގެ "ތަގްސް އޮފް ހިންދުސްތާން" ގައި ވެސް އެ ދެ މީހުން އެކީގައި މަސައްކަތްކުރި އެވެ.
އާމިރާއި ފާތިމާއާ ދެމެދު "ސިއްރު" ގުޅުމެއް އޮންނަ ކަމަށް ވާހަކަތަކެއް ދެކެވުނަސް އެކަމާ ބެހޭ ގޮތުން އެ މީހުން އެއްވެސް ވާހަކައެއް ނުދައްކަ އެވެ. އެކަމަކު ފާތިމާ އަކީ އާމިރުގެ އާއިލާއާ ވަރަށް ގާތްކޮށް އުޅޭ މީހެކެވެ. އެގޮތުން އާމިރުގެ އާއިލާގެ އެކިއެކި ހަފުލާތަކުން ފާތިމާ ފެނުމަކީ އާންމު ކަމެކެވެ.